Búgin Ońtústik Qazaqstan oblysynda «Qazaqstan balalary sheksiz álemde!» respýblikalyq shyǵarmashylyq kino festivali bastaldy.
QR Bilim jáne Ǵylym ministrliginiń bastamasymen Ońtústikte alǵash ret uiymdastyrylǵan sharaǵa ministrliktiń qosymsha bilim berýdi damytý ortalyǵynyń ókilderi men oblys ákiminiń orynbasary U.Sádibekov, elimizdiń barlyq aimaqtarynan kelgen mektep oqýshylary jáne ustazdar qatysty, dep habarlaidy OQO ákiminiń baspasóz qyzmeti.
Elbasy Nursultan Nazarbaevtyń «Rýhani jańǵyrý: bolashaqqa baǵdar» baǵdarlamasynyń «Tárbie jáne Bilim» tarmaǵyndaǵy «Daryndylar eli» jobasy boiynsha iske asqan bul shara úzdik klassikalyq jáne zamanaýi óner úlgilerin igerý, daryndy balalar men jastardy anyqtaý, tulǵalyq rýhani mádenietin qalyptastyra otyryp, jas urpaqty patriottyqqa tárbieleý bolyp tabylady.
Respýblikalyq shyǵarmashylyq kino festivaline 600 -den asa oqýshy qamtylyp otyr. Onyń ishinde 160 oqýshy deńgeili úmitkerler.
Qatysýshylar búginde «Ainalaǵa qara!» jáne «Týǵan jer» taqyryptarynda túrli janrdaǵy qysqametrajdy filmder men shyǵarmashylyq sheshimi bar derekti filmder, animatsiialyq jáne áleýmettik rolik, mýzykalyq filmder usynyp otyr.
Festival barysynda «Qamqorlyq» jobasy sheńberinde erekshe bilim berýdi qajet etetin balalardyń qolóner buiymdary jinaqtalyp, arnaiy jármeńke uiymdastyrylyp otyr. Sonymen qatar, Ońtústik óńirinen shyqqan tanymal drama jáne kino akterleriniń foto-sýret kórmesi men «Ońtústik film» kinostýdiiasynyń taqyryptyq beine filmi kórermen nazaryna usynyldy.
Eki kúnge jalǵasatyn festival qorytyndysynda jeńimpazdar arnaiy diplommen, sertifikatpen jáne baǵaly syilyqtarmen marapattalatyn bolady.
