Ońtústik Qazaqstan oblysynda alǵash ret «Dostyq kókpary» uiymdastyryldy. Túrli ult ókilderi jastarynyń basyn qosqan ulttyq oiynnyń ótýine oblystyq Qazaqstan halqy Assambleiasy men oblys ákimdigine qarasty «Qoǵamdyq kelisim» mekemesi muryndyq boldy, dep habarlaidy Ult.kz tilshisi QazAqparat agenttigine silteme jasap.
Maqtaaral aýdanynda ótken ulttyq oiynǵa elýden astam shabandoz qatysty. Ulttyq qundylyqtardy nasihattaý ári jastar arasynda dostyqty nyǵaitý maqsatynda ótken sharanyń ashylý saltanatynda Maqtaaral aýdanynyń ákimi Ǵalym Ismailov pen «Qoǵamdyq kelisim» mekemesiniń basshylary sóz sóilep, shabandozdarǵa sáttilik tiledi.
«Ońtústiktiń jastary arasynda buryn-sońdy mundai «Dostyq kókpary» ótpegen. Jarysqa túrli etnos jastary qatysyp otyr. Bul oiyn salaýatty ómir saltyn qalyptastyrýmen qatar, jastardyń ózara tatýlyq pen yntymaǵyn arttyrady. Ulttyq sportty ulyqtaýǵa arnalǵan sharalar aldaǵy ýaqytta da jalǵasady dep senemin», - dedi Maqtaral aýdanynyń ákimi Ǵalym Ismailov.
Kókparda «Yntymaq», «Birlik», «Dostyq», «Baishubar» dep atalatyn tórt komandanyń at qulaǵynda oinaǵan palýan jigitteri bas júldeni jeńip alý úshin baryn saldy. Tartysty oiynnan erekshe áser alǵan kópshilik jarysty sońyna deiin tapjylmai tamashalady. Oiyn sońynda jeńimpazdar men júldegerlerge uiymdastyrýshylar tarapynan diplom jáne qarjylai syiaqy tabys etildi. Sonymen qatar, oiyn barysynda eptiligimen kózge túsken shabandozdar da arnaiy nominatsiialarmen marapattaldy.
