Búgin oblys ákimi J.Túimebaevtyń tóraǵalyǵymen oblystyq tótenshe jaǵdailardyń aldyn alý jáne joiý komissiiasy otyrysynyń kezekti májilisi ótti. Jiynǵa komissiia músheleri, aýdan, qala ákimderi men jaýapty baskarma basshylary qatysty.
Kún tártibinde sý tasqyny qaýipin aldyn alý jáne joiý boiynsha 2017-2020 jyldarǵa arnalǵan «Jol kartasy» jobasyna engizilgen 1-kezeńdik is-sharalardyń júzege asyrý barysy talqylandy. Bul týraly oblystyq aýyl sharýashylyǵy basqarma basshysynyń mindetin ýaqytsha atqarýshy Turǵanbek Ospanov baiandama jasady.
Onyń aitýynsha, óńirdegi sý tasqynyna qarsy injenerlik 98 is-shara atqarylyp, sý jinaqtaý kólemi 342,75 mln. sharshy metrdi quraityn 30 shaǵyn sý qoimasy aiqyndalypty. Nátijesinde 12 nysan boiynsha jobalaý smetalyq qujattama ázirlengen. Biyl jergilikti biýdjetten 2 nysanǵa 174, 2 mln. teńge bólinse, qalǵan 10 nysanǵa 960,98 mln. teńge qarastyrylǵan. Alaida respýblikalyq jol kartasyn bekitý kezinde Ońtústik Qazaqstan oblysy boiynsha 29 nysan engizilmei qalǵan. Osy qalǵan 29 nysan boiynsha oblystyq deńgeide arnaiy is-sharalar kesheni ázirlenip, oblystyq biýdjetten 2,1 mlrd. teńge bólingen. Jalpy quny shamamen 6,3 mlrd. teńge bolatyn 30 shaǵyn sý qoimasynyń qurylysyn júzege asyrý II - kezeńnen turady. Búgingi kúni atalǵan jospardyń birinshi kezeńinde jalpy quny 3,8 mlrd. teńge bolatyn 5 jobany iske asyrý josparlanǵan.
Kún tártibindegi ekinshi másele - oblys aýmaǵyndaǵy seismikalyq qaýipsizdikti qamtamasyz etý týraly oblystyq energetika jáne turǵyn úi-kommýnaldyq sharýashylyq basqarmasynyń basshysy Marǵulan Maraiym baiandama jasady. Onyń aitýynsha, jalpy oblysymyzda 3253 kópqabatty turǵyn úi bar. Onyń búginde 1393-i kúrdeli, 1035-i aǵymdaǵy jóndeý jumystaryn qajet etedi. Al, tehnikalyq zertteý qorytyndysyna sai oblysta qaita qalpyna keltirýge jatpaityn apatty 14 úi bar. Budan bólek, 18 úidiń seismo jaǵdaiyn nyǵaitý qajet. Biyl 7 úige oblystyq biýdjet esebinen 753,0 mln. teńge bólinipti.
Kún tárbibindegi úshinshi másele - asa qaýipti juqpaly aýrýlardyń aldyn alý. Bul týraly Ońtústik Qazaqstan oblysynyń qoǵamdyq densaýlyq saqtaý departamentiniń basshysy Nurbek Nyshanov jan-jaqty baiandady. Oblysymyzda kene shaǵý jaǵdailary byltyrǵy jylmen salystyrǵanda 28,9 paiyzǵa tómendegen.
Jiyndy qorytyndylaǵan oblys ákimi jaýapty basqarma basshylary negizgi úsh másele týraly naqty tapsyrmalar júktedi.
«Aýdan, qala biýdjeti esebinen arnaiy baǵdarlama ashyp, avariialyq jáne eski turǵyn úilerdi buzýdy jáne seismonyǵaitý jumystaryn kúsheitý qajet. Bul rette qurylys sapasy qatań qadaǵalaýǵa alynýy tiis», - dedi Janseiit Qanseiituly.
Sondai-aq ákim oblysymyzdaǵy asa qaýipti juqpaly aýrýlardyń aldyn alý jumystaryna myqtap mán berýdi tapsyrdy. Bul rette kóshelerde sút jáne et ónimderiniń baqylaýsyz satylýyna jol berilmeýi kerektigi júkteldi.
OQO ákiminiń baspasóz qyzmeti
