Ońtústik Qazaqstan oblysynda Ádep jónindegi keńes múshesi kóshpeli jiyn ótkizdi. Osy aýdanǵa jaýapty jáne oblystyq máslihattyń depýtaty Ábilqasym Dosbolov Saryaǵash aýdanynyń Álimtaý aýyly turǵyndarymen jáne memlekettik qyzmetshilerimen kezdesti, dep habarlaidy QazAqparat tilshisi.
Kezdesý barysynda Ábilqasym Úsipbaiuly elimizde qolǵa alynǵan Ádep jónindegi pilottyq jobanyń maqsatymen tanystyryp ótti. Ádep jónindegi keńestiń jumysy quqyqbuzýshylyqtyń saldarymen emes, onyń sebepterin anyqtaýǵa baǵyttalǵanyn jetkizdi. Sonymen qatar, keńestiń mindetteriniń biri memlekettik qyzmette ózara qarym-qatynastyń joǵary mádenietin qalyptastyrýǵa jáne memlekettik qyzmetshilerdiń ádepsiz minez-qulyq jaǵdailarynyń aldyn alý ekendigine toqtaldy. Eger memlekettik qyzmetshiler nemese mekemeler tarapynan oryn alǵan kez kelgen quqyqbuzýshylyqtar týraly shaǵymdardy QR Memlekettik qyzmet isteri jáne sybailas jemqorlyqqa qarsy is-qimyl Agenttiktiń OQO boiynsha departamentiniń 8(7252) 51-51-51 senim telefonyna qaldyrýǵa bolatynyn túsindirdi.
Aita keteiik, Ádep jónindegi keńes músheleriniń jeke jumysyn engizý boiynsha elimizdiń 3 óńirinde, atap aitqanda Astana qalasy, Qostanai jáne Ońtústik Qazaqstan oblystarynda pilottyq joba júzege asyrylýda. Jobanyń negizgi maqsaty - Ádep jónindegi keńes músheleriniń jumys belsendiligin arttyrý bolyp tabylady. Osy oraida, ońtústik óńirinde pilottyq jobany engizý aiasynda Ádep jónindegi keńes músheleriniń arnaiy blankileri ázirlendi. Endi Ádep jónindegi keńes músheleri óz atynan memlekettik mekemelerge arnaiy ázirlengen blankilerde suraý joldaýǵa múmkindik aldy. Oǵan qosa, Ádep jónindegi keńes músheleriniń azamattardy qabyldaý, kóshpeli kezdesýler ótkizý kesteleri bekitilip, oblystaǵy árbir aýdan, qalalarmen jumys jasaityn Ádep jónindegi keńesiniń músheleri aiqyndalǵan bolatyn.
