Ońtústik Qazaqstan oblysynda túrli deńgeidegi máslihattaǵy bos oryndarǵa sailaý ótti. Óńirdegi jeti sailaý okrýgine kelgen daýys berýshiler óz tańdaýlaryn jasady. Búgin bul týraly OQO óńirlik kommýnikatsiialar qyzmetinde ótken brifingte oblystyq aýmaqtyq sailaý komissiiasynyń tóraǵasy Álibek Ómiráliev málim etti, dep habarlaidy "Ult aqparat".
Álibek Ómirálievtiń sózinshe, sailaýdy ázirleý jáne ótkizý barysynda komissiiasynyń atyna eshqandai aryz-shaǵym túsken joq. Sailaý Konstitýtsiialyq zań talaptaryna sai ótkizilgen. Nátijesinde № 11 oblystyq sailaý okrýgi boiynsha oblystyq máslihattyń depýtaty bolyp «Uly Orda» JShS-niń prezidenti Qairat Súleimenov sailanǵan. Al, № 35 sailaý okrýgi okrýgi boiynsha ózge úmitkerlerden «SAURAN group» JShS-niń keńesshisi Abdýrashit Omarov basym túsken.
«Sonymen qatar, № 49 sailaý okrýgi boiynsha oblystyq máslihattyń depýtaty bolyp «Hamit» AÓK basqarmasy tóraǵasy Sermaniiazov Baqytjan Qypshaqbaiuly, al № 50 sailaý okrýgi boiynsha oblystyq máslihattyń depýtaty bolyp Qazaqstan injenerlik-pedagogikalyq «Halyqtar dostyǵy» ýniversitetiniń rektory Qýatbekova Rabiǵa Ábdimusaqyzy sailandy», - dedi Álibek Ómiráliev.
Komissiia tóraǵasynyń aitýynsha, bos oryndarǵa depýtat sailaý úshin oblys boiynsha 10 sailaý okrýgi jumys istep, 91 myń 974 adam daýys bergen. Jalpy depýtattyqqa 42 adam ótinish bildirgen. Olardyń 38-i tirkelip, onyń 20-sy deklaratsiialyq aiyrmashylyq pen jeke aryzdary boiynsha sailaýǵa qatystyrylmaǵan. Qalǵan 18 úmitkerdiń ishinde 4 adam oblystyq, 2 úmitker qalalyq, 1 adam aýdandyq máslihatqa sailandy.
