Astana qalasynda Ońtústik Qazaqstan oblysy kúnderi aiasynda «EKSPO-2017» halyqaralyq kórmesine arnalǵan aýyl sharýashylyǵy ónimderiniń jármeńkesi bastaldy, dep habarlaidy "Ult aqparat".
Eki kúnge josparlanǵan sharada ońtústikqazaqstandyq taýar óndirýshiler jalpy quny 265 mln teńge bolatyn ónim ótkizbek. Onyń ishinde et jáne et ónimderi 104 tonna, kókónis 188 tonna, sút ónimderi 54 tonnany quraidy. EKSPO qonaqtary dámi til úiirer Shardaranyń qaýyn-qarbyzy, Túlkibastyń almasy men Saryaǵashtyń qyzanaǵynan dám tatsa, al jármeńkege barǵan sharýalar ónimderin satyp qana qoimai, halyqaralyq sharany tamashalaýǵa múmkindik alyp otyr.
«Búgingi sharaǵa ońtústik sharýalary erekshe daiyndyqpen keldi. Mundaǵy baǵalar bazardaǵydan 20-25 paiyzǵa arzan bosatylýda. Kelýshilerdiń basym kópshiligi et jáne sút ónimderine qyzyǵýshylyq tanytýda. Jármeńkeniń eń basty ereksheligi retinde mundaǵy aýyl sharýashylyǵy ónimderiniń tabiǵi tazalyǵyn aitsaq bolady», - deidi oblystyq aýyl sharýashylyǵy basqarmasy basshysynyń orynbasary Turǵanbek Ospanov.
Bul Ońtústik sharýalarynyń EKSPO aiasyndaǵy 5-shi jármeńkesi. Negizgi tártipke sai otandyq ónimder qala turǵyndary men qonaqtaryna jármeńke túrinde usynylýda. Jalpy Ońtústik Qazaqstan oblysy EKSPO kórmesi aiasynda 6 ret jármeńke uiymdastyrýdy josparlasa, osy aralyqta Elordaǵa 12976 tonna aýyl sharýashylyǵy ónimderi tasymaldanbaq.
Biyl oblysymyzda egis kólemi 20,7 myń gektarǵa artyp, 809,5 myń gektardy qurady.Tabiǵattyń qolailyǵyna bailanysty biyl óńir sharýalary mol ónim alýda. Máselen, búgingi kúnge oblys boiynsha 762 myń tonna kókónis, 1 mln tonnadan astam baqsha daqyldary men 208 myń tonna kartop jinaldy.
