Ońtústik Qazaqstan oblysynyń ákimi Janseiit Túimebaev latyn álipbiin nasihattaý maqsatynda kelgen arnaiy top múshelerimen kezdesti. Top quramynda Shymkentke Erlan Sairov, Ámirjan Qosanov, Talǵat Qaliev, Aqberen Elgezek, bloger-jýrnalist Rýslan Jeldibaimen kezdesý barysynda ákim jańa álipbi jaiyn sóz etti, dep habarlaidy "Ult aqparat" óńir basshysynyń baspasóz qyzmetine silteme jasap.
«Bizdiń el 1929-1940 jyldary latyn álipbiin qoldanyp, bastan ótkerdi. Demek, biz latynǵa qaita oralamyz. Latyn álipbii arqyly biz túrki halyqtaryna tildik turǵydan jaqyndap, rýhani jaǵymyzdan kemeldene túsýimizge jol ashamyz. Árine, elimiz úshin táýelsizdik, týǵan jer, ulttyq qundylyq qasietti uǵymdar. Mine, bul turǵyda Elbasynyń «Rýhani jańǵyrý» baǵdarlamalyq maqalasynda memlekettik, ulttyq máselelerdiń sheshimi aityldy. Endeshe barlyǵymyz jumyla kirisýimiz kerek», - dedi Janseiit Qanseiituly.
Kezdesý aiasynda sóz alǵan belgili saiasattanýshy Erlan Sairov: «Latynǵa oralý - saiasi qadam, ońdy sheshim ári tarihi oqiǵa» degen pikir bildirdi. Basqosqandar jańa álipbi týrasynda oilaryn ortaǵa saldy.
«Latyn álipbiine kóshýden esh qoryqpaýymyz qajet. Eń bastysy, saiasi sheshim qabyldandy. Endi ary qarai ony júzege asyrýǵa kiriskenimiz jón», dep atap ótti Ámirjan Qosanov.
Budan bólek, Talǵat Qaliev toptyń negizgi maqsatyn aita kele, elimizdegi jastarǵa arnalǵan ortalyqtardyń jumys isteý júieleriniń jańaryp jatqandyǵyn jetkizdi.
Kezdesý sońynda oblys basshysy arnaiy kelgen qonaqtarǵa alǵys bildirip, jumystaryna sáttilik tilep, estelik syilyqtar tabys etti.
