Ońtústik Qazaqstan oblysynyń ákimi Janseiit Túimebaev óńirlik delegatsiiamen birge EKSPO-2017 halyqaralyq kórmesin aralap kórdi. Delegatsiia «Nur Álem» pavilonyn tamashalap, ǵalymdardyń eń ozyq jobalarymen tanysty, dep habarlaidy Ult.kz tilshisi QazAqparat agenttigine silteme jasap.
Ákim bastaǵan delegatsiia pavilonnyń ár qabatynda usynylǵan jel, kún, biomassa, sý jáne ǵarysh energiiasynyń úlgilerimen jan-jaqty tanysyp, óńirde júzege asyrýǵa bolatyn tiimdi jobalar jaiyn ózara talqylady.
Munan bólek, olar sheteldikterdiń usynǵan zamanaýi tehnologiiasynyń jańa jetistikterin tamashalap, qýat kúshin alatyn tyń joba - jeke aimaǵyn aralap kórdi.
EKSPO kórmesi Qazaqstannyń áleýetin kórsetýge zor múmkindik beretinin aitqan ákim halyqaralyq sharanyń mańyzyna toqtaldy.
«Óte joǵary deńgeide uiymdastyrylǵan EKSPO kórmesine otandyq jáne sheteldik qonaqtardyń kóptep kelýi bizdi qýantady. Ózderińiz kórip otyrǵandai aýqymy keń kórmeni aralaýǵa bir kún jetpeidi. Álemniń aldyńǵy qatarly memleketteri ǵylymdaǵy sońǵy jańalyqtaryn usynyp otyrǵan bul halyqaralyq sharany tamashalaýdy árbir qazaqstandyqqa keńes berer edim. Bul ulttyq rýhymyzdy kóterip, keleshek urpaqtyń ǵylym men bilimge qushtar bolyp ósýine úlken serpin bereri sózsiz», - dedi oblys ákimi.
Sonymen qatar, jumysshy top «EKSPO - 2017» halyqaralyq mamandandyrylǵan kórmesi aiasynda Ońtústik Qazaqstan oblysynyń Astana qalasyndaǵy kúnderi boiynsha ótkiziletin is-sharalardyń barysyn pysyqtady.
Elimizdiń bas qalasynda 29 tamyz ben 3 qyrkúiek kúnderi elordalyqtar men qonaqtar nazaryna 42 túrli mádeni jáne áleýmettik is-sharalar usynylmaq. Sondai-aq, Qazaqstandaǵy 30 eldiń elshileri qatysatyn óńirdiń investitsiialyq múmkindikteri tanystyrylatyn biznes-forým, aýyl sharýashylyq ónimderiniń jármeńkesi men «Ońtústik ónimderi» oblys taýaróndirýshileriniń kórmesi ótedi dep josparlanýda.
