Búgin Ońtústik Qazaqstan oblysynyń ákimi Janseiit Túimebaev Qurban ait merekesine orai, Shymkent qalasyndaǵy kópbalaly otbasynyń shańyraǵy men qaladaǵy №3 balalar úiinde bolyp, balalarǵa mektepke qajetti quraldar toltyrylǵan sómkelerdi syiǵa tartty, dep habarlaidy "Ult aqparat".
Eń aldymen oblys ákimi Qurban ait merekesimen quttyqtap 10 balany tárbielep otyrǵan Eralievterdiń otbasyna baryp, mektepke baratyn jeti balasyna sabaqqa qajetti zattar men úlken teledidar tartý etti.
Óz sózinde aimaq basshysy qasietti mereke kúni otbasyǵa beibitshilik pen tatýlyq, amandyq jáne qut-bereke tilep, balalarǵa Abai, Jambyl, Qurmanǵazy, Muhtar Áýezovtyń muralaryn jalyqpai oqyp, bilimdi de tárbieli azamat bolyp ósýin aitty.
Nurbolat pen Gýlfairýz ata-apasymen birge 10 ul-qyzdy tárbielep ósirýde. Onyń segizin batyr ana ózi dúniege ákelse, sonymen qosa, baýyrynyń jetim qalǵan eki balasyn baýyryna basqan. Eralievterdiń úlkeni 22 jasta, al kishkentaiy 1 jas 3 aiǵa tolyp otyr.
Munan soń, óńir basshysy Shymkentte ornalasqan №3 balalar úiine baryp, jańa oqý jylynda 1 synypqa baratyn 15 oqýshyǵa mektepke qajetti quraldar toltyrylǵan sómkeler men ózgede mektepke baratyn 32 balaǵa sabaqqa qajetti zattardy tabystady.
Balalardyń ár qaisysymen tildesken aimaq basshysy olardyń taqpaqtary men ánderin tyńdady. Sonymen qatar, EKSPO-ǵa baryp kelgen balalar kórmeden alǵan áserlerimen bólisip, álemdik deńgeide uiymdastyrylǵan kórmeni kórýge qoldaý kórsetken ákimge alǵystaryn jetkizdi.
Búginde munda 65 bala tárbielenýde. Olardyń ár qaisysy túrli ulttan bolǵanymen barlyǵy bir tilde iaǵni, qazaq tilinde sóileidi. Birneshe tildi meńgergen balalar ónerli de sulý ári tárbieli. Aita keteiik, qazirgi tańda munda 3 jastan 11 jasqa deiingi 65 jetim jáne ata-anasynyń qamqorlyǵynsyz qalǵan bala tárbielenedi.
Balalar úiinde oqý-tárbie jumysy tolyǵymen qazaq tilinde júrgiziledi. Onda bi, vokal, qol óner úiirmeleri jumys isteidi. Úiirmege 58 bala qatysady. Sabaqtan tys ýaqytta túrli is-sharalar uiymdastyrylady. Shymkent qalasyndaǵy №33 orta mektepte 47 bala bilim alsa, solardyń 15-i erteń birinshi synypqa barady. Sondai-aq, ótken jyldyń qyrkúiek aiy men osy jyldyń qyrkúiek aiy aralyǵynda 45 balany ata-analar qamqorlyǵyna alǵan.
