Ońtústik Qazaqstan oblysynyń ákimi, «Nur Otan» partiiasy oblystyq filialynyń tóraǵasy Janseiit Túimebaev partiia filialynyń bas ǵimaratynda qoǵamdyq qabyldaý ótkizdi. Óńir turǵyndary aýyldyq jerdegi elektr baǵanalarynyń eskirgenin, meditsinalyq saqtandyrý júiesi, áielder genderlik saiasatynyń máselelerin qaýzap, Názir Tórequlovtyń týylǵanyna 125 jyl tolýyn atap ótý, turǵyn úi kezegin jyljytý jóninde kómek surady. Aldyna kelgen ár turǵynnyń máselesin muqiiat tyńdaǵan óńir basshysy tiisti oryndarǵa tapsyrmalar berdi.
Qoǵamdyq qabyldaýǵa kelgen Sairam aýdany Tespe eldimekeniniń turǵyny zeinetker Jamalbek Perneev aýyldaǵy elektr baǵanalarynyń eskirgenin aityp shaǵymdandy.
«Aýylymyzdaǵy elektr baǵanalary ábden tozyp, qulaýdyń aldynda tur. Bul máseleni kóterip, aýdan basshylyǵyna da shaǵym túsirgenbiz. Alaida bul máseleniń oń sheshimi bolmaý tur»,- dedi zeinetker.
Oblys ákimi atalǵan máseleniń 2018 jyly investitsiialyq baǵdarlama aiasynda sheshiletinin aitty.
«Sairam aýdany, Kólkent aýyldyq okrýgi, Tespe aýylynda ornatylǵan 6,254 shaqyrym elektr jelisi men transformator «Ońtústik Jaryq Tranzit» JShS-niń teńgeriminde. 2016 jyly «Ońtústik Jaryq Tranzit» JShS-gi investitsiialyq baǵdarlamasy esebinen jaramsyz 12 dana aǵash baǵanalary symdarymen aýystyrylǵan. Al biyl qosymsha 1 dana qýaty 100 kVA bolatyn transformator ornatý josparda bar. 2018 jylǵy investitsiialyq baǵdarlamaǵa sáikes turǵyndardy qamtamasyz etýdegi 100 kVA transformatordy 160 kVA transformatorǵa, tómengi kerneýli 0,4 kV-tyq elektr baǵanalary men qosa elektr jelisin tolyǵymen aýystyrý josparlanǵan», - dedi Janseiit Qanseiituly.
Munan soń ákim aldyna oblystyq áielder keńesiniń tóraiymy Baian Jandosova kirdi. Baian Aitbekqyzy óńirimizdegi áielder qaýymynyń jáne otbasy qundylyqtaryn saqtaý tóńiregindegi qordalanǵan máselelerge toqtaldy.
Almaty qalasynyń turǵyny Názir Tórequlov halyqaralyq qaiyrymdylyq qorynyń prezidenti Ábdijappar Saparbaev qoǵam qairatkeri Názir Tórequlovtyń týylǵanyna 125 jyl tolýyn ońtústik jerinde atap ótýdi surandy.
Qazaqstandyq densaýlyq saqtaý qyzmetkerleriniń salalyq kásipodaǵynyń OQO filialynyń tóraiymy Aianiiazova Rita aýyldyq jerlerdegi meditsinalyq saqtandyrý júiesiniń oryndalý barysyn sóz etti.
Al Sairam balalar úiiniń túlegi Lýiza Salimjanqyzy 2013 jyldan úi kezegine tirkelgenin, alaida baspanaǵa qol jetkize almai otyrǵanyn jáne kúieýiniń jumyssyz júrgenin aityp shaǵymdandy. Kezdesý barysynda ákim shaǵymdanýshyǵa jyl sońyna deiin páter beriletinin málimdep, jumyssyz júrgen otaǵasyn jaýapty azamattarǵa eńbekpen qamtamasyz etýdi tapsyrdy.
