Biyl qoǵam qairatkeri Tólebek Qosmambetov 70 jasqa tolyp otyr. Osy dataly merekege orai Ońtústik Qazaqstan oblysynyń ákimi Janseiit Túimebaev mereitoi iesimen kezdesti, dep habarlaidy "Ult aqparat" óńir basshysynyń baspasóz qyzmetine silteme jasap.
Kezdesý barysynda óńir basshysy qairatkerdiń ómir jolyna toqtalyp, ystyq lebizin bildirdi.
«Siz kieli Ońtústik óńirinde ósip-ónip, boiyńyzdaǵy bar kúsh-jigerińizdi, saliqaly oi men bilimińizdi, ómirińizdi memleketimizdiń damýyna, órkendeýine jumsap kelesiz. Ómir jolyńyzdy qarapaiym jumysshydan bastap, memlekettik qyzmette birqatar belesterdi baǵyndyrdyńyz. Qazaqstan Respýblikasy Parlamenti Májilisiniń depýtaty qyzmeti kezinde elimizdiń qoǵamdyq-saiasi, áleýmettik-ekonomikalyq damýyna qyzmet etetin sapaly zań jobalaryn qabyldaýda súbeli úles qosqan memleket qairatkerisiz», - dedi Janseiit Qanseiituly.
Tólebek Qosmambetov 1947 jylǵy 5 shildede Ońtústik Qazaqstan oblysy Arys qalasynda dúniege kelgen. 1967 jyly Almaty halyq sharýashylyǵy institýtyn injener-ekonomist mamandyǵy boiynsha bitirdi. Eńbek jolyn 1969 jyly Qazaq KSR-nyń Memlekettik josparlaýdyń aǵa ekonomisi qyzmetinen bastaǵan ol túrli jaýapty qyzmetterdi abyroimen atqardy.
1999 jyly QR Parlamenti Májilisiniń depýtaty, 2004 jylǵy qarashadan bastap úshinshi sailanymnyń depýtaty, al 2007 jylǵy tamyzdan bastap úshinshi sailanymnyń depýtaty, Qarjy jáne biýdjet komitetiniń múshesi boldy.
1993 jyly Resei Federatsiiasy Úkimetiniń janyndaǵy Aýyl sharýashylyǵy akademiiasyn tabysty bitirip, ǵylymi dárejege ie bolyp, joǵary bilikti menedjer atandy. 2001 jyly Máskeý qalasynda kandidattyq dissertatsiiany qorǵap, Resei Federatsiiasynyń Bilim ministrligi janyndaǵy joǵary attestatsiialyq keńes ekonomika ǵylymynyń kandidaty degen ǵylymi ataq berildi.
Tólebek Baidúisenuly QR Prezidentiniń Qurmet gramotasy men «Qurmet» ordeniniń iegeri. Zaiyby Gúlistan Kenjehanova ekeýi 3 ul, 1 qyz tárbielep ósirgen.
