Ońtústik Qazaqstan oblysynyń ákimi Janseiit Túimebaev BUU halyqtyń qonystanýy salasyndaǵy IýNFPA qorynyń Qazaqstandaǵy ókili Djýliia Vallezemen kezdesti, dep habarlaidy óńirlik ákimdiktiń baspasóz qyzmeti.
Kezdesý barysynda taraptar ana men bala ólimin azaitý, genderlik teńdikdi saqtaý, turmys jaǵdaiyndaǵy zorlyq-zombylyqty boldyrmaý jóninde ózara pikir almasty. Sondai-aq, tyǵyz qarym-qatynasta jumys isteý maqsatynda Ońtústik Qazaqstan oblysynan atalǵan qordyń ókildigin ashý máselelerin talqylady. Óz kezeginde sóz alǵan óńir basshysy Djýliia Vallezeni jańa qyzmetimen quttyqtap, aldaǵy atqarar jumystaryna sáttilik tiledi.
«Ońtústik Qazaqstan oblysy Qazaqstandaǵy demografiialyq ahýaly óte joǵary óńir sanalady. Bizde jylyna 80 myńǵa jýyq sábi dúniege keledi. Qazaq halqynyń negizgi shoǵyry da bizde ornalasqan. 3 millionǵa jýyq halqy bar óńirde analardyń úles salmaǵy 50 paiyzdy quraidy. Sondyqtan oblysymyzda ana men bala ólimin azaitý máselesine erekshe mán berilip keledi. Osy rette siz basqaryp otyrǵan qordyń Ońtústik Qazaqstan oblysynda óńirlik ókildigin ashýdy usynǵan bolar edim», - dedi Janseiit Qanseiituly.
Óz kezeginde sóz alǵan Djýliia Valleze qordyń ana men balanyń reprodýktivti densaýlyǵyn jaqsartý, genderlik teńdik pen demografiialyq máselelerdi qamtý salalaryndaǵy negizgi missiialaryn baiandap berdi.
«Biz mán beretin negizgi máseleniń biri - ana men bala densaýlyǵyn saqtaý. Osy rette analardyń bosaný kezindegi qaýiptiligin qamtamasyz etip, josparly júktilik máselesine mán beremiz. Jastardyń ana bolýǵa degen daiyndyq jumystaryn kúsheitip, genderlik teńdikti saqtaýǵa, halyqtyń demografiialyq ósimine saraptama jasap otyrýdy maqsat tutamyz. Joǵaryda aitylǵan jumystardy birlesip atqarý maqsatynda yntymaqtastyqta birigip jumys isteýge niet bildirip otyrǵandaryńyzǵa alǵys bildiremin», - dedi Djýliia Valleze.
Kezdesý barysynda Ońtústik Qazaqstan oblysy ákimdigi men BUU halyqtyń qonystanýy salasyndaǵy IýNFPA qory arasynda ózara túsinistigi jaily memorandýmǵa qol qoiyldy. Taraptar jergilikti densaýlyq saqtaý júiesiniń áleýetin, ana men bala densaýlyǵyn qorǵaý boiynsha keshendi baǵdarlamany birlesip iske asyrý jóninde mámilege keldi. Sondai-aq taraptar genderlik zorlyqqa vedomstvoaralyq áreket etý júiesin engizý arqyly turmystyq zorlyqtyń aldyn alý boiynsha basqarý áleýetin nyǵaitýǵa ýaǵdalasty.
