Búgin Ońtústik Qazaqstan oblysynyń ákimi Janseiit Túimebaev bastaǵan delegatsiia jumys saparymen Jambyl oblysyna bardy, dep habarlaidy "Ult aqparat" oblys ákiminiń baspasóz qyzmetine silteme jasap.
Delegatsiia múshelerin Jambyl oblysynyń ákimi Kárim Kókirekbaev shekaralas aimaqtan kútip alyp, birneshe iri óndiristik jáne áleýmettik jobalarmen tanystyrdy.
Ońtústikqazaqstandyq delegatsiia eń aldymen kún kózinen qýat alatyn «Býrnoe Solar-1» stantsiiasynda boldy. Jobaǵa salynǵan jalpy investitsiia quny 122 mln. AQSh dollaryn quraidy. Ortalyq Aziiadaǵy eń iri stantsiia qurylysyn «Samuryq-Qazyna Invest» JShS-i britandyq UG Energy Limited kompaniiasymen birge júrgizgen.
Sapar barysynda tústik óńirden barǵan qonaqtar Taraz qalasynan 12 shaqyrym qashyqtyqta ornalasqan Aisha bibi kesenesine aialdady. Bul tarihi oryn ortaǵasyrlyq sáýlet eskertkishteriniń biri. Bizdiń kúnge kielim orynnyń tek batys bólshegi saqtalǵan. Kesene 60 túrli oiý-órnekteri bar epigrafikalyq beldeýmen jasalǵan.
Janseiit Qanseiituly bastaǵan bir top depýtattar budan bólek «Qarahan» kesenesi men «Keńeshan qajy» meshitinde boldy. Al «Qazaq handyǵyna 550 jyl» monýmenti mańynda Áýlieata óńiriniń ziialylyrymen tildesti. Kóne shahar tórinde Kerei men Jánibek hannyń beineleri menmuńdalap tur.
Jumys sapary barysynda delegatsiia músheleri «Taraz-Arena» sport kesheninde boldy. Olimpiadalyq jetkinshekterdi daiarlaityn «Atletik» oqý-jattyǵý kesheniniń jumysymen de tanysty. Biregei sport keshenderi salaýatty ómir saltyn nasihattaý jáne ár túrli jastaǵy turǵyndardy áýesqoi jáne kásipqoi sport túrlerimen ainalysýǵa jappai jumyldyrý maqsatynda soǵylǵan.
Sondai-aq, Ońtústikten kelgen delegatsiia mineraldy tyńaitqyshtar óndiretin «Kazfosfat» JShS-niń jumysymen tanysty. Kásiporyn óz jumysyn mineraldy tyńaitqyshtardy, sary fosfor men onyń týyndy ónimderin ótkerý naryǵyn qaita qalpyna keltirýden bastaǵan. Seriktestik taǵamdyq ortofosfor qyshqyly, baiaý gidrattalýshy natrii úshpolifosfaty siiaqty jańa ónim túrlerin shyǵarady. Ónimniń 95 paiyzyn shet elge eksporttaidy.
Sapar barysynda oblys ákimi Janseiit Túimebaev jańadan ashylǵan Jambyl Jabaev atyndaǵy «Rýhaniiat» rýhani damytý ortalyǵynda boldy. Ortalyqtyń birinshi qabatynda ornalasqan ekspozitsiiamen tanysty. «Bul ortalyq Jambyl oblysynyń tanymal qairatkerleriniń tarihyn, júrgen joldaryn zerttei otyryp, rýhani damýdy kózdeidi. Áýlieata jerine jasaǵan saparyn Rýhani ortalyqta qorytyndylaǵan aimaq basshysy Uly Jibek saýda jolynda sozylǵan kóne shahar kún sanap kórkeiip kele jatqanyn atap ótti. Munan soń, Rýhani ortalyqtaǵy estelik kitapshaǵa qoljazbasyn qaldyrdy.
