Búgin Shymkent qalasynda ótken «Densaýlyq-2017» festivali aiasynda Ońtústik Qazaqstan oblysynyń ákimi Janseiit Túimebaev Germaniianyń Gambýrg qalasynda ótken bokstan Álem chempionatynyń altyn júldegeri Qairat Eraliev pen qola medal iegeri Jomart Erjandy jeńisterimen quttyqtap, syi-qurmet kórsetti, dep habarlaidy oblystyq ákimdiktiń baspasóz qyzmeti.
Nemis jerinde ótken dúbirli dodada elimizdiń qorjynyna jalǵyz altyndy alyp berip, kók týymyzdy kókke jelbiretken álem chempiony Qairat Eralievke oblys ákimi 4 million teńgeniń sertifikatyn tabys etti. Al, álem chempionatynyń qola medalin enshilegen Jomart Erjanǵa 1 million teńgeniń sertifikatyn tapsyrdy.
Sonymen birge, oblys ákimi Qairat Eralievtiń jeke bapkeri, bokstan Qazaqstan quramasynyń bas jattyqtyrýshysy Myrzaǵali Aitjanovqa 4 million teńge, al úshinshi oryn ielengen boksshymyzdyń jeke bapkeri Núrken Andasovqa 1 million teńge qarjylai syilyq tabystady.
Óńir basshysy jeńimpaz sportshylarymyzdyń álem chempionatynda kórsetken erligi jastardy otanshyldyqqa tárbielep, sportqa degen qyzyǵýshylyǵyn arttyrýǵa septigin tigizetinin aitty.
«Sizder álemdik dodada el namysyn qoldan bermei, biik tuǵyrdan kórindińizder. Aldaǵy ýaqytta da osy baǵyttaryńnan taimai, biik belesterdi baǵyndyra berýlerińe tilektestik bildiremin», - dedi Janseiit Qanseiituly.
Qairat pen Jomart - bilikti basshy Balǵabai Elshiev basqaratyn oblystyq joǵary sport sheberligi mektebiniń saiypqyrandary. Jigitterdiń chempionatqa daiyndalýyna oblystyq dene shynyqtyrý jáne sport basqarmasynyń basshysy Álibek Nurtaev ta bar jaǵdaidy jasady. QR Boks federatsiiasynyń da eńbegi mol. Senim men eńbek aqtalyp, órenderimiz kók týdy biikke órletti.
