Búgin Ońtústik Qazaqstan oblysynyń ákimi Janseiit Túimebaev jumys saparymen Maqtaaral aýdanynda bolyp, Elbasy mindettegen tapsyrmalardyń aýdanda júzege asyrylýyn baqylady.
Sonymen birge memlekettik baǵdarlamalar aiasynda isin órge dóńgeletken birqatar kásiporyndardyń jumysymen tanysyp, sharýalarmen kezdesti, dep habarlaidy OQO ákiminiń baspasóz qyzmeti.
Sapar barysynda aimaq basshysy Asyqata kentindegi «Aq altyn» maqta zaýytynyń maqta shikizatyn daiyndaityn tehnologiialyq protsesimen jáne daiyn ónim túrlerimen tanysty.
Qurylǵanyna jarty ǵasyr tolǵan Ońtústiktegi irgeli kásiporynnyń ujymy biyl 50 jyldyǵyn atap ótýde. Munda 265 adam jumyspen qamtylǵan. Jylyna 60 myń tonna maqta shikizatyn daiyndap, ony TMD memleketterine eksporttaidy.
Qazaqstandaǵy tuqymdyq shittiń 70-80 paiyzyn dál osy kásiporyn daiyndaidy. Kooperatsiia ieligindegi 400 gektar jerge maqta, júgeri, jońyshqa, taǵy da basqa daqyldar egilgen, sondai-aq, kásiporynǵa qarasty taýarly-sút fermasynda 200 asyl tuqymdy iri qara mal ósiriledi.
«Maqtaral aýdanynyń oblys aýyl sharýashylyǵyn damytýǵa qosyp otyrǵan úlesi orasan. Osy rette diqandar men sharýalarǵa memleket tarapynan tiisti deńgeide qoldaý bildirilip otyrǵanyn aita ketýge tiispiz. Oblysymyzdaǵy sharýa qojalyqtary kooperativ bop birigip, «Ońtústik» aimaqtyq investitsiialyq ortalyǵy men «Yrys» shaǵyn qarjy uiymynyń qarjylai qoldaýyna ie bolyp, tabystaryn eseleýge múmkindik aldy», - dedi Janseiit Qanseiituly.
Aita keteiik, jumysshylardyń áleýmettik-turmystyq jaǵdaiyn jaqsartý, ómir súrýlerine barynsha qolaily jaǵdai jasaý maqsatynda 50 jyl ishinde 100-ge tarta turǵyn úi, birneshe eki qabatty kottedjder salynǵan. Sonymen qatar, kásiporynnyń demeýshiligimen 140 oryndy balabaqsha boi kóterdi. Qazirgi kezde Asyqata kentindegi «Zaýyt» móltekaýdanynda 220-dan astam otbasy turady. Gaz, aýyz sý, jol máselesi tolyq sheshilgen.
Munan keiin ákim Asyqata kentindegi «Aq altyn bereke» sút ónimderiniń tsehyn aralap kórip, jumysshylardyń ahýalymen tanysty. 2008 jyly qurylǵan kásiporyn jylyna 400 tonna ónim óndiredi. Sút, qaimaq, irimshik, airan t.b. ónimder oblys aýmaǵyna taralyp, ońtústik turǵyndaryn ekologiialyq taza ónimdermen qamtamasyz etedi. Amangeldi Súttibaevtyń basshylyǵyndaǵy kásiporynda 20 adam jumyspen qamtylǵan.
Munan soń oblys ákimi Maqtaral aýyldyq okrýgindegi "Jarqyn" sharýa qojalyǵynda boldy. 1997 jyly qurylǵan qojalyqta 92,2 gektar jer bar. 2017 jyly 72,2 gektarǵa kúrish, 15 gektarǵa maqta daqylyn ekken.
Sondai-aq, J.Túimebaev osy aýyldyq okrýgtegi "Baǵdat" sharýa qojalyǵyndaǵy maqta jinaý naýqanyna kýá boldy. Jer kólemi 287,5 gektardy quraityn qojalyq biyl 187,5 gektarǵa maqta daqylyn ekken. 36 adamdy jumyspen qamtyp otyrǵan qojalyqtyń ieliginde 30-ǵa jýyq tehnika bar.
Jalpy biyl Maqtaral aýdanynda 94 myń gektarǵa maqta daqyly egilgen. Onyń búginde 63 myńnan astam gektaryndaǵy jiym-terim jumystary aiaqtalýǵa jaqyn. Sharýalar gektaryna ortasha eseppen 20 tsentnerden ónim alýda.
