Ońtústik Qazaqstan oblysynda biylǵy oqý jylynda jańa 20 mektep iske qosylady. Taǵy 23 mekteptiń qurylysyn 2018-2019 jyldary aiaqtaý josparlanyp otyr. Bul týraly oblys ákimi Janseiit Túimebaev óńirdegi bilim qyzmetkerleriniń tamyz konferentsiiasynda málimdedi, dep habarlaidy Ult.kz tilshisi QazAqparat agenttigine silteme jasap.
Aimaq basshysynyń sózinshe, biyl respýblika kóleminde 1 qyrkúiek kúni jańadan 48 mektep berilse, sonyń 20-sy ońtústik óńirinde ashylady. Sondai-aq óńirde biylǵy jyly bilim salasyn qarjylandyrýǵa oblystyq biýdjetten 257,6 mlrd. teńge bólingen. Munan bólek, 31,2 mlrd. teńgege 79 bilim nysanynyń qurylysy júrgizilip jatsa, onyń 29 bilim nysany jyl sońynda paidalanýǵa berilmek. Osylaisha aldaǵy tórt jyl kóleminde 205 jańa mektep salý josparlanyp otyr.
«Aýyldardy mektepter salynyp jatyr, ol bizdiń mindetimiz. Al biyl Ulttyq biryńǵai testileýde respýblika boiynsha 15-shi orynǵa turaqtap otyrmyz. Al 431 «Altyn belgi» iegeri 100 baldy da jinai almaǵan. Túlekterdiń 13 paiyzy shekti 50 baldy da jinai almaǵan. Mine, bizdiń deńgeiimiz. Sondyqtan birigip jumys isteýimiz kerek. Mektep bitirgen jastar suranysqa ie mamandar bolýy kerek, jumyssyz júrmeýi tiis. Búgingi tamyz keńesi - bilim berý isindegi jeńisterimiz ben kemshilikterdi saralaityn aishyqty alań jáne aldymyzda turǵan mindetterdi pysyqtaityn mańyzdy basqosý. Elbasy Nursultan Ábishuly Nazarbaev «Tabysty bolýdyń eń irgeli, basty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatarynda bilim árdaiym birinshi orynda turýy shart. Sebebi, qundylyqtar júiesinde bilimdi bárinen biik qoiatyn ult qana tabysqa jetedi» degen bolatyn. Sondyqtan da búgingi tań - bilim berý mazmunyna, oqýshy men pedagog tulǵasyna jáne qyzmetine degen kózqarastar túbegeili ózgeriske bet buryp otyrǵan kúrdeli kezeń», - dedi óńir basshysy.
Oblys ákiminiń aitýynsha, jańa oqý jylynda mektepterge 640 myńǵa jýyq oqýshy keledi dep josparlanyp otyr. Bul mekteptegi bala sany ótken jylmen salystyrǵanda 28 myńǵa artady degen sóz. Onyń ishinde 1-synypqa baratyn balalar sany 73 691 balany qurap otyr. Jalpy óńir boiynsha 1036 mektep bar bolsa, onyń 7-eýi - jeke menshik. Oǵan qosa, osy oqý jylynda 8 jańa mektep ashyldy dep kútilýde, Maqtaral aýdanynda 1-eý, Ordabasy aýdanynda 2-eý, Sairam aýdanynda 1-eý, Túlkibas aýdanynda 1-eý jáne Shymkent qalasynda úsh mektep. 2017-2018 oqý jylynda 11-synypty 35 myńǵa jýyq túlek bitiretini kútilýde. Sondai-aq, óńirde qazirgi tańda 69 myńnan asa muǵalim bilim beredi. Budan bólek, balalardy oqýlyqpen qamtamasyz etýge 4,5 mlrd. teńge bólingen. Ózbek, tájik mektepterine arnalǵan jańa mazmundy synyp oqýlyqtary aýdarylyp, baspadan shyǵarylýda. Osyndai jumystar atqarylyp jatqan soń óńir basshysy bilim salasy qyzmetkerlerin sapaǵa mán berip jumys isteýge shaqyrdy.
