Foto: t.me/antikornews
"ÓKM Operatory" isi boiynsha izdeýde júrgen kúdikti Birikken Arab Ámirliginde ustaldy, - dep habarlaidy "Ult aqparat" Antikor baspasóz qyzmetine silteme jasap.
"Sybailas jemqorlyqqa qarsy qyzmet buǵan deiin "ÓKM Operatory" JShS-niń burynǵy quryltaishysy Sh.Muqtarovaǵa asa iri mólsherde jymqyrý kúdigimen halyqaralyq izdestirý jariialaǵan bolatyn.
Ol Dýbai qalasynda ustalyp, Interpoldyń kómegimen Birikken Arab Ámirlikteriniń ýákiletti organdary qamaýǵa aldy", - delingen habarlamada.
Qazirgi ýaqytta Qazaqstan Respýblikasynyń Bas prokýratýrasy ony ekstraditsiialaý rásimin júzege asyryp jatyr.
"ÓKM Operatory" isi
Keibir málimetter boiynsha, Qazaqstannyń eks-prezidenti Nursultan Nazarbaevtyń kishi qyzy Áliia Nazarbaevamen bailanysty "ÓKM Operatory" ýtilizatsiia alymyn jinaǵan. Iaǵni bolashaqta kólikti ýtilizatsiialaýǵa qajet bolatyn birjolǵy tólemder alyp otyrǵan.
2021 jyldyń sońynda mundai stavka men avto qunyna narazylyq bildirgen qazaqstandyqtar petitsiia jasady. Olar kólikke ýtilizatsiialyq alym tólenbeýge tiis dedi.
Prezident Qasym-Jomart Toqaev 11 qańtarda Májiliste sóilegen sózinde "ÓKM operatory" fýnktsiiasyn toqtatýdy jáne mólsherlemeni qaita qaraýdy tapsyrdy.
Onyń pikirinshe, munymen shet elderdegidei memlekettik uiym ainalysýǵa tiis. "ÓKM operatorynyń" jumysyn endi "Jasyl Damý" kompaniiasy atqarady.
Aita keteiik, byltyr qańtarda "ÓKM Operatory" JShS basqarma tóraǵasy Medet Qumarǵaliev qamaýǵa alyndy. Al naýryz aiynda "ÓKM Operatory" JShS burynǵy bas direktory Svetlana Korotenkoǵa qatysty tergeý bastaldy. Ol 2016 jyldan bastap 2021 jylǵa deiin kásiporynnan avtomobilderdi ýtilizatsiialaýǵa joǵary qun belgilei otyryp, 20 milliard teńgeden astam somany urlady degen kúdikke ilindi.
Sáýir aiynda Antikor "ÓKM Operatory" JShS-nyń burynǵy basqarýshy direktoryn ustady. Oǵan 13 milliard teńge urlady degen aiyp taǵylyp otyr. Zańsyz alynǵan aqshany ol Recycling Company JShS-ǵa aýdarǵan.
"ÓKM Operatory" quqyqtyq máseleler jónindegi basqarýshy direktory Rýslan Shámshiev jumys kabinetinde óz-ózine qol jumsady.
Sottyń sheshimimen burynǵy ekologiia vitse-ministri Ahmetjan Pirimqulov jeti jylǵa bas bostandyǵynan aiyryldy. Medet Qumarǵaliev pen Svetlana Korotenko da týra sondai jazaǵa kesildi. Qarjy direktory bolǵan Rýstam Temirbekov eki jylǵa sottaldy.
