AQSh kongresiniń ókilder palatasy 18 jeltoqsanda Prezident Donald Trampqa impichment jariialaý máselesi boiynsha daýys berip, basym bóligi Tramp impichmentin qoldady. Endi bul máseleni aldaǵy ýaqytta senat qaraýy tiis.
230 kongressmen impichmentti qoldap, daýys berdi, 197-si qarsy shyqty. Daýys berý negizinen kongressmenderdiń qai partiia múshesi bolǵanyna qarai anyqtalǵan siiaqty: demokrattardyń barlyǵy-derlik impichmentti qoldady, respýblikashyldardyń barlyǵy qarsy shyqty.
Osylaisha Donald Tramp AQSh tarihynda kongrestiń ókilder palatasy impichment jariialaǵan úshinshi prezident atandy. Ókilder palatasy oǵan eki aiyp boiynsha impichment jariialaýdy qoldady: qyzmettik ókiletin asyra paidalaný jáne kongress zertteýine kedergi keltirý. Alǵashqy aiyp boiynsha, Tramp prezident ókiletin paidalanyp, shetel áriptesiniń kómegimen (naqty jaǵdaida Ýkraina) 2020 jyly bolatyn prezident sailaýyndaǵy saiasi qarsylasyna qarsy isti zertteýge tyrysqan. Ekinshi aiyp boiynsha, Tramp impichment jariialaý múmkindigi boiynsha kongress zertteýi kezinde suraý salynǵan myńdaǵan qujatty bermegen jáne osy zertteý aiasynda kongress talqylaýyna barmaq bolǵan kýágerlerge kedergi keltirgen.
Endi Trampqa impichment jariialaý máselesin senat qaraidy. Boljam boiynsha, daýys berý qańtar aiynda ótedi.
Michigandaǵy sailaý kampaniiasy kezinde daýys berýge bailanysty pikirin aitqan Tramp "demokrattar ondaǵan million Amerika patriotynyń biýlletenin (2016 jyly prezident sailaýy kezinde Trampty jaqtaǵan adamdar sany) jaramsyz qylýǵa tyrysyp jatyr" dedi.
AQSh-ta impichment daýy Tramptyń 25 shildede Ýkraina prezidenti Vladimir Zelenskiimen bolǵan áńgimesinen soń týǵan. Amerikalyq basylymdar Tramp 2020 jyly ótetin sailaýda básekelesi bolýy yqtimal Djo Baidenniń ústinen jemqorlyq daýy boiynsha is qozǵaýǵa Zelenskiidi májbúrlemek bolǵan dep jazdy. Synshylar Trampty "qyzmet ókiletin asyra paidalanyp, yqtimal básekelesine qarsy derek tabýǵa tyrysty" dep aiyptady. Donald Tramp bul aiyptaýlardy joqqa shyǵardy.
Tramp pen Zelenskii arasyndaǵy áńgime mazmuny belgili bolǵan soń AQSh Kongresi ókilder palatasyndaǵy demokrattar Trampqa "sertin buzǵany úshin" impichment jariialaý protsesin bastaǵan. Buǵan deiin Ýkraina prezidenti Vladimir Zelenskii ózine Tramptyń qysym jasamaǵanyn aitqan.
