Almatyda jappai tártipsizdikter kezinde narazy toptyń áskeriler men quqyq qorǵaý organdarynyń qyzmetkerlerin uryp jatqan videony áleýmettik jelide jariialaǵan avtor Jandos Qurmanbaev oqiǵanyń jai-japsaryn aityp berdi, dep habarlaidy QazAqparat.
«Sol kúnderi men Almatydaǵy oqiǵalardyń kýási boldym. Dál terezemniń astynan 5 qańtar kúni shamamen túski saǵat 14:40-ta Ulttyq ulannyń myńnan asa jaýyngeri men 500-ge tarta arnaiy jasaq áskeri ótti. Olardyń artynan taiaq, armatýra, áskerilerden tartyp alynǵan qalqan jáne kaskamen qarýlanǵan top júrdi. Shamamen 15 myńǵa jýyq adam. Olar - 17 men 25 jas arasyndaǵy jastar. Keiin olar dúken sórelerin sol taiaqtarmen syndyryp, tonaǵan bolatyn. Telefonymda Ulttyq ulan jaýyngerleri men arnaiy jasaq áskerlerin aiaýsyz uryp-soǵyp, tepkilep jatqan video bar. Olardyń bári kúrteleriniń kapiýshonyn túsirip kiip alǵan. Betinde maska, qoldarynda taiaq boldy. Alǵan soqqysynan jerde es-tússiz jatqan sarbazdardy artynsha taǵy bir top jigit kelip, bastan teýip ketti. Basynan soqqy alǵan tártip saqshysy qatygez toptan qutylamyn degen úmitpen jolǵa júgirip shyǵady, biraq joldan jańadan qosylyp jatqan buzaqylar jábirlenýshini odan ári ólimshi etip uryp-soǵýdy jalǵastyrdy.
Bular da bizdiń qazaq, onyń da anasy bar, úide balalary kútip otyr! Qyzmet babynda bireýdiń ómirin qiiýǵa kim quqyq berdi? Bul - onyń jumysy, ol tek bastyǵynyń buiryǵyn oryndaidy. Ony nege qyryp jatyrsyń? Qasym-Jomart Toqaevtyń atý týraly buiryǵyn tolyq qoldaimyn. Ol bizdiń Konstitýtsiia bergen kepildikti oryndady. Meniń aitqanymnyń bári videoǵa jaqynnan túsirildi, Facebook-te jariialanady. Osy kisi óltirýshiler men tonaýshylardyń tabylyp, jaýapqa tartylǵanyn qalaimyn. Men barlyq materialdardy Almaty politsiia departamentine berýge daiynmyn» dep jazdy Jandos Qurmanbaev Facebook paraqshasynda.
Onyń aitýynsha, bacbuzarlar - halyq emes. Bular - narazylyq bildirýshiler emes. Bular - jaqsy ómirdi talap etip shyqqandar emes. Beibit sherýge shyqqandardyń arasyna jasyryn qosylǵan aram piǵyldy adamdar.
Eki kúnnen keiin olarǵa bankomat tonaýshylar, atys qarýy jáne lommen qarýlanǵan basbuzarlar qosyldy.
«Aita keteiin, meniń úiim ornalasqan kósheniń qiylysyna memlekettik nómiri joq alty kólik bir mezette toqtady. Meniń oiymsha, qalanyń basqa aýdandarynda da solai boldy. Muny arnaiy bailanys quralynsyz, josparsyz, motivatsiiasyz uiymdastyrý múmkin emes. Sonymen qatar, kóshede mas jastar da boldy. Olar tún ortasynda aiqailap, dúkenderdi tonap, talqandap, kólikterdi toqtatyp jatty. Osy kórinistiń bári beibit miting degenge kelmes. Men barlyǵyn ustap, jazalaýdy talap etemin, bulardy qamaý kerek. Qalai bolǵanda da, bári jan-jaqty tekserilip, kináliler jazasyn alýy tiis», - dep qosty ol.
