Bul týraly Kriminaldyq politsiia qyzmetkeri Janbolat Qamarov aityp berdi, dep habarlaidy Baq.kz saity.
Ishki ister ministrliginiń kriminalistikalyq oq-qarý qoimasy bar. Onda ashylmaǵan qylmystardan, oqiǵa oryndarynan jetkizilgen oq-gilzalardy, tárkilengen qarýlardan atylǵan oq jetkiziledi. Qyzmetkerler jetkizilgen oq-qarýlardy avtomattandyrylǵan izdestirý júiesine engizip, bizge baǵyttaidy. Iaǵni, Qazaqstannyń barlyq óńirinen jetkiziledi, - dedi ol.
Janbolat Qamarovtyń aitýynsha, oq-dáriler mikroskop arqyly qarap, zertteledi.
Atylǵan qarýlardan jiberilgen oq-gilzalar bar. Solarmen ashylmaǵan qylmystar boiynsha oqty qaraý jumysyn júrgizemiz. Iaǵni, atys qarýynyń nusqasyn, túrin jáne júiesin anyqtaimyz. Sol arqyly sáikestendirý jumystary júrgiziledi. Osylaisha, anyqtalǵan oqtar ákelingen óńirlerge baǵyttalady. Ol anyqtalyp jatsa, tergeýshi nemese sot-saraptamalyq ortalyǵy saraptama taǵaiyndaidy. Sebebi biz zertteýmen ǵana ainalysamyz, saraptama zań boiynsha bizden sot-saraptamasyna tapsyryldy, - dedi Qamarov.
Onyń aitýynsha, ballistika bólimi sýyq qarýdy emes, kriminalistikalyq oq-gilzalardy zertteidi.
Oq-gilzany zertteý ýaqytyn naqty aitý qiyn. Oq-gilzalar kalibrlerge jikteledi. Sondyqtan keibir oqty anyqtaý ońaiǵa soqsa, keibireýin zertteý kúrdeli bolady. Bizde jinalǵan qor da barshylyq. Sondyqtan ol kóp ýaqyt alýy da múmkin. Keide bir gilzanyń ózin anyqtaý kóp ýaqytqa sozylýy múmkin. Oqtyń da qarýǵa qatysty jeke sipattamalary bolady. Ony dáleldeý kerek bolady. Sondyqtan qandai qarýdan atylǵanyn anyqtaý úshin bir nemese eki kún, álde jarty saǵat ketedi dep naqty aitý múmkin emes. Biraq biz múmkindiginshe jyldam qaraýǵa tyrysamyz, - deidi Janbolat Qamarov.
