Qaraǵandy oblysynyń Dolinka kentinde 10 jastaǵy bala joǵary kerneýli tok soǵyp, aýyr jaǵdaida aýrýhanaǵa tústi. Qazir ol jansaqtaý bóliminde em qabyldap jatyr, dep habarlaidy ult.kz.
Oqiǵa balalar oiyn alańynan birneshe metr jerde ornalasqan elektr jetkizý jelisiniń tireginde bolǵan. Týystarynyń aitýynsha, bala dostarymen birge oinap júrip, elektr baǵanyna órmelegen. Kýágerlerdiń sózinshe, ol symdarǵa qol tigizbegenimen, joǵary kerneýli jeliniń elektr doǵasynyń áserine ushyraǵan.
Balalar qatty dybysty estip, balanyń es-tússiz jerge qulaǵanyn kórgen. Alǵashqylardyń biri bolyp kórshisi kómekke júgirip kelip, jedel járdem jetkenshe qoldan tynys aldyrý sharalaryn jasaǵan.
«Kómek sál keshikkende, qaiǵyly jaǵdai bolýy múmkin edi», – deidi balanyń ápkesi Anastasiia Rabiza.
Tok soǵýy men biiktikten qulaý saldarynan bala aýyr jaraqat alǵan. Týystarynyń málimetinshe, júregi, ókpesi, basy, omyrtqasy jáne ishki aǵzalary zaqymdanǵan. Qoldary men iyǵynda kúiik izderi bar.
Oblystyq kópsalaly balalar aýrýhanasynyń Balalar hirýrgiiasy ortalyǵynyń jetekshisi Beibit Berdibekovtiń aitýynsha, naýqastyń jaǵdaiy aýyr bolǵanymen turaqty.
«Qazirgi ýaqytta bala qarqyndy terapiia bóliminde jatyr. Emdeý tolyq kólemde júrgizilýde», – dedi dáriger.
Oqiǵadan keiin otbasy músheleri elektr tiregine aparatyn soqpaq joldyń bar ekenin baiqaǵan. Olardyń aitýynsha, qaýipti nysannyń mańynda qorshaý da, eskertý belgileri de joq.
Týystary balalar jii júretin aýmaqta ornalasqan elektr jelisi tireginiń qaýipsizdigine qatysty sharalar qabyldaýdy talap etip otyr.
Qaraǵandy oblysy Politsiia departamentiniń málimetinshe, oqiǵa boiynsha materialdar Qaraǵandy oblysy boiynsha Atomdyq jáne energetikalyq qadaǵalaý men baqylaý komitetiniń aýmaqtyq departamentine joldanǵan. Tekserý nátijesine sáikes quqyqtyq baǵa berilmek.
Qazirgi ýaqytta oqiǵanyń barlyq mán-jaiy anyqtalyp jatyr.
