Búgin oblys ákimi, Almaty oblystyq Qazaqstan halqy Assambleiasynyń tóraǵasy Amandyq Batalov Taldyqorǵandaǵy Dostyq úiinde bolyp, Assambleia múshelerimen kezdesti.
Aldymen jinalǵandardy Jańa jylmen quttyqtaǵan oblys ákimi óńirdiń ótken jylǵy áleýmettik-ekonomikalyq tabystaryna da toqtalyp ótti. Sonyń ishinde aýyl sharýashylyǵy, ónerkásip, týrizmdi órkendetý, infraqurylymdardy damytý, mektepter men balabaqshalar salý jáne basqa da irgeli ister jaily aitty.
- Elbasy óńirlerge úlken kóńil bólip otyr. Oblysqa kelgen saparynda aýdandar arasyndaǵy ekonomikalyq teńgerimsizdikti joiý týraly tapsyrma bergen bolatyn. Aldymen Kóksý, keiin Aqsý qant zaýyttaryn iske qosý arqyly qazir qyzylsha ósirýshi aýdandardyń óndiristik qýaty artyp, Almatydai iri megapolispen irgeles jatqan aýdandardan qalyspai keledi. Qyzylshamen qatar júgeri ósirý de jolǵa qoiyldy. Osynyń bári eldiń ál-aýqatyn arttyrýǵa yqpal etip otyr, - dedi A. Batalov.
Munan soń oblys basshysy etnosaralyq tatýlyq, el ishindegi yntymaq pen birlik máselesi, Elbasynyń «Rýhani jańǵyrý» jáne «Uly Dalanyń jeti qyry» maqalalarynan týyndaityn mindetter jaily da keńinen sóz qozǵady.
Odan keiin «Ulaǵat» aqsaqaldar keńesiniń tóraiymy Svetlana Gaitova, tatar etno mádeni ortalyǵynyń jetekshisi Rýslan Valishanov, orys etno mádeni ortalyǵy jetekshisiniń orynbasary Larisa Kotelnikova, Analar keńesi tóraiymnyń orynbasary Ǵaliia Aqbasova jáne basqa da birlestikterdiń ókilderi sóz alyp, óńirdegi oń ózgeristerge degen kózqarastaryn bildirdi. Atap aitqanda, Taldyqorǵan qalasynyń kúnnen kúnge kórkeiip kele jatqanyna, aýyl sharýashylyǵy men kásipkerlikke qoldaý kórsetý sharalaryna, árbir etnostyń óz tili men dástúrin, mádenietin saqtaýǵa jasalyp otyrǵan jaǵdaiǵa rizashylyqtaryn aitty. Budan bylai da bereke-birliktiń arqasynda eldi órkendetý isine atsalysa beremiz degen tilekterin jetkizdi.
Osy kezdesýde Assambleianyń birqatar múshelerine oblys ákimi A. Batalov Qurmet gramotasyn, Alǵys hatyn jáne Dostyq úiiniń 10 jyldyǵyna arnalǵan tósbelgilerdi tapsyrdy.
Sonymen qatar Almaty oblystyq Qazaqstan halqy Assambleiasynyń hatshylyq meńgerýshisi Ǵabit Tursynbai el birligin nyǵaitýǵa eńbegi úshin beriletin Qazaqstan halqy Assambleiasynyń «Birlik» altyn medalin oblys ákimi Amandyq Batalovqa tabystady.
