QR Bilim jáne ǵylym ministri Erlan Saǵadiev oblystarda bilim berýdiń sapasyn baǵalaý nátijesin jariialady, dep xabarlaidy QazAqparat tilshisi.
Ministrdiń aitýynsha, búginde mektep oqýshylarynyń bilimin baǵalaý nátijesinde respýblika boiynsha ortasha kórsetkish 39,4 upaidy qurady. Alaida keibir oblystardyń upailary respýblikalyq kórsetkishten de tómen.
«Máselen, Aqtóbe oblysy - 29,4 upai, Soltústik Qazaqstan oblysy - 30 upai, Ońtústik Qazaqstan oblysy - 31 upai. Osy oblystardyń bilim berý sapasyn arttyrýǵa nazar aýdarýdy suraimyz», - dedi E.Saǵadiev Úkimettiń búgingi otyrysynda.
Osy oraida Úkimet basshysy Baqytjan Saǵyntaev aldymen Jambyl oblysynan esep berýdi surady. Sebebi ol jaqta 16 indikator boiynsha tiisti kórsetkishter oryndalmady. Oblys ákimi Asqar Myrzaxmetov ministrliktiń esebimen kelispeitinin jetkizdi.
«Bizdegi málimet boiynsha baǵdarlamanyń barlyq kórsetkishteri oryndalyp otyr. Tek qana ulttyq biryńǵai test boiynsha...», - dedi A.Myrzaxmetov.
Osy kezde Premer-Ministr Jambyl oblysy boiynsha ministrliktiń esebin tolyǵymen oqyp berýdi usyndy.
«Sizge bárin oqyp bereiin be? Joq, álde ózińiz Bilim jáne ǵylym ministrligimen xabarlasyp anyqtaisyz ba?», - dep surady B.Saǵyntaev.
Oblys basshysy atalǵan usynyspen kelisti.
«Bizdegi málimet basqa... Negizi, bizde tórt indikator boiynsha 25 kórsetkish tolyǵymen oryndalǵan. Atap aitsaq, ótken jyly 4623 orny bar 33 balabaqsha jáne 4 shaǵyn ortalyq ashyldy. Sonyń ishinde 30-y jekemenshik balabaqsha, sóitip oblysta mektepke deiingi bilimmen qamtý deńgeii 1-6 jas aralyǵynda 68 protsentti, al 1-3 jas aralyǵynda 92 protsentti qurap otyr. Bilim berýdiń jańartylǵan mazmuny boiynsha 10 321 muǵalim oqytyldy. Bul - barlyq muǵalimderdiń 42 protsenti. Biyl taǵy 5 295 pedagog oqytylady. Osylaisha, jalpy kórsetkish 62,3 protsent bolmaq. Jańartylǵan baǵdarlamamen sabaq beretin muǵalimderdiń jalaqysyna qosymsha 30 protsent aqy aǵymdaǵy jyly naýryz aiynda tolyǵymen tólendi. Baqytjan Ábdiruly, ministrlik usynǵan málimet eskirip qalǵan bolýy kerek. Ruqsat bolsa, biz ministrlikpen taǵy anyqtaiyq», - dep atap kórsetti A.Myrzaxmetov.
Premer-Ministr Baqytjan Saǵyntaev bolsa, málimet jaǵynan eshqandai aiyrmashylyq joq ekenin jetkizdi.
«Kórdińiz be, tekseremiz dep edik, qaramaǵyńyzdaǵylar eskirip qalǵan málimet dep shyǵa keldi. Málámetterdiń bári Sizder bergen tsifrlar boiynsha jasaldy. Biz óz tarapymyzdan eshteńe qosyp otyrǵan joqpyz. Qaramaǵyńyzdaǵy ózińizdiń kómekshilerińizge qatań talap qoiyp surańyz», - dedi B.Saǵyntaev.
Otyrys barysynda Aqtóbe oblysynyń ákimi Berdibek Saparbaev ta óz esebin usyndy. Ol jaqta 13 kórsetkish oryndalmai otyr. Onyń aitýynsha, 32 kórsetkishtiń ekeýi ǵana oryndalmaǵan.
«Bilim ministrligimen sáikespeýshilikter bar. Biz keshe olarmen jumys jasadyq. Olarǵa bárin túsindirip dáleldedik. Ministrlik 9 aidyń kórsetkishterin alyp otyr. Al 12 aidy alatyn bolsaq, onda ekeýinen basqasy tolyǵymen oryndalǵan», - dep atap kórsetti B.Saparbaev.
Ákimniń sózine qaraǵanda, bilim berý sapasy jaǵynan kemshilikter bar. Sol úshin bilim basqarmasynyń basshysy qyzmetinen bosatylǵan bolatyn. Batys Qazaqstan oblysy da ministrlik esebimen sáikespeýshiliktiń bar ekenin alǵa tartty. Sebebi atalǵan esep ótken jyldyń 9 aidyń qorytyndysy boiynsha jasaldy.
