Almaty oblysynda koronavirýs infektsiiasynyń taralýynyń aldyn alý jumystaryna tartylǵan óńirdegi meditsina qyzmetkerlerine syiaqy berý úshin biýdjetten 137 mln. teńge bólindi. Bul týraly búgin oblys ákimi Amandyq Batalov Taldyqorǵan qalasy mańynda qoiylǵan sanitarlyq posttardy aralaǵan kezinde aitty, dep habarlaidy óńir basshysynyń baspasóz qyzmeti.
Sanitarlyq postta habarlama jasaǵan Taldyqorǵan qalasynyń ákimi Ǵalymjan Ábdiraiymovtyń aitýynsha, sanitarlyq posttardan ótý birneshe kezeńnen turady. Aldymen politsiia qyzmetkerleri qalaǵa kiretin adamnyń tirkelgen jerin onlain formatta tekseredi, eger olar Taldyqorǵan qalasynyń nemese onyń mańaiyndaǵy eldi mekenderdiń turǵyndary bolmasa, onda kólikter keri qaitarylady. Kirgen kólikterdiń barlyǵy dezinfektsiialanady, árbir júrgizýshi men jolaýshy teplovizor arqyly tekseriledi. Taldyqorǵan mańaiyndaǵy sanitarlyq posttardyń barlyǵy da osyndai printsippen jumys isteidi.
Atap ótsek, Almaty – Taldyqorǵan trassasynyń 3-shi bólimshe jaǵynan qalaǵa kireberisine qoiylǵan 1-shi sanitarlyq posttyń ózinen búgin 800 mashina ótken, qalaǵa 1520 adam kirdi, sol siiaqty 420 mashina keri qaitarylǵan. Al Tekeli – Taldyqorǵan trassasynan qalaǵa kireberistegi arkanyń janynda ornalasqan 3-shi sanitarlyq posttyń jumysy bastalǵaly beri 35 myńnan astam avtokólik tekserilip, dezinfektsiialanǵan, qalaǵa 84 myńǵa jýyq adam kirgen.
Aralaýdyń sońynda Amandyq Batalov koronavirýs infektsiiasynyń taralýyna jol bermeýge baǵyttalǵan jumystarǵa tartylǵan qyzmetkerlerge syiaqy beriletinin aitty:
«Birinshi kezekte syiaqy meditsina qyzmetkerlerine beriledi. Bul maqsatqa biz 137 mln. teńge bóldik. Odan keiin qaýipti infektsiianyń taralýyn toqtatý úshin, halyqtyń densaýlyǵy men ómirin saqtaý úshin postta kúni-túni jumys istep júrgen politsiia qyzmetkerlerine, basqa da qyzmetterdiń, jergilikti atqarýshy organdardyń qyzmetkerlerine beriledi», - degen A.Batalov barlyq sanitarlyq posttar men blokposttarda kúsheitilgen rejimde jumys isteýdi jalǵastyrý kerektigin aitty.
«Kóp nárse sizderdiń árqaisylaryńyzdyń sapaly da jaýapty jumystaryńyzǵa bailanysty. Virýstyń taralýyna jol bermeýimiz kerek. Sondyqtan eger qajet bolsa, barlyq qyzmetterden qosymsha adam tartyńyzdar. Posttardyń jumys isteýine qajetti jaǵdailardyń bári bar, biz qoldaý kórsetýdi jalǵastyra beremiz, - dep qorytyndylady A.Batalov.
Atap ótsek, oblys boiynsha barlyǵy 103 post jumys isteidi, onyń 57-si - sanitarlyq jáne 46-sy - blokpost. Qajettiligine qarai olardyń sany ulǵaitylatyn bolady.
