Memleket basshysy Qasym-Jomart Toqaev Batys Qazaqstan oblysynyń ákimine óńirdegi ózekti problemalardy sheshýdi tapsyrdy, dep habarlaidy Sputnik Qazaqstan.
"Oblystaǵy elektr jelileriniń 80 protsenti tozǵan. Apattar jii bolyp, elektr qýaty qaita-qaita úzile beredi. Mysaly, 2020 jyly elektr qýaty 182 ret úzilgen. Bul máseleni sheshý úshin qandai sharalar qabyldanyp jatyr?", - dep surady Toqaev úkimettiń keńeitilgen otyrysynda.
BQO ákimi Ǵali Esqaliev óńirde elektr jelileriniń uzaqtyǵy 20 myń shaqyrymnan asatynyn jáne tozýy 80%-ti quraitynyn atap ótti.
"Sonyń kesirinen eldi mekenderde, ásirese, aýyldarda energiiamen qamtý turaqsyz. Eki aýdanymyz elektr qýatyn Reseiden satyp alyp otyr. Iaǵni, elektr jelisin qalpyna keltirý jáne eki aýdanǵa jańa elektr jelisin tartý ózekti másele. Osy suraqty sheshý úshin tiisti sharalar qoldanyp jatyrmyz", - dedi Esqaliev.
Aitýynsha, úkimettiń qoldaýymen aimaqtyq energiia taratý kompaniiasynyń aktsiialary kommýnaldyq menshikke aýysýda. Úkimetpen kelisip, elektr jelini qalpyna keltirý úshin "Nurly jer" baǵdarlamasyna tiisti ózgerister engizilýi múmkin.
Prezident jergilikti joldardyń máselesin de kóterdi. Aitýynsha, olardyń úshten ekisi óte nashar jaǵdaida, bul turǵyndardyń narazylyǵyn týdyrady.
"Túrli sebepterge bailanysty burynnan sheshilmei kele jatqan problemalar. Qazir úkimet oblystaǵy máselelerge nazar aýdarýy kerek dep oilaimyn. Oblystyń strategiialyq mańyzy bar, Reseimen shektesedi. Problemalar sheshimin tabýy tiis", - dedi Toqaev Esqalievke.
Oblys ákimi tiisti sharalar qabyldanyp jatqanyn aitty.
