Aýdandyq jáne qalalyq bilim berý bólimderiniń basshylaryn oblystyq bilim berý basqarmasynyń basshysy taǵaiyndaityn bolady. Bul týraly QR Bilim jáne ǵylym vitse-ministri Bibigúl Asylova aitty, dep habarlaidy "Ult aqparat".
«Oblystyq deńgeide ortalyqtandyrýdy eskere otyryp, oblys ákimdikteriniń aldynda barlyq bilim berý uiymdaryn ornalasqan jerine qaramastan teńgerimdi ári ataýly qarjylandyrýdy qamtamasyz etý boiynsha mindet júkteledi. Ministrlik bilim berý basqarmalarymen ózara tyǵyz qarym-qatynasty qalyptastyra otyryp, óz sheshimderin barynsha tiimdi qabyldai alady jáne eldegi árbir mektepke nemese balabaqshaǵa ádistemelik kómek kórsetedi. Osy ózgeristerge bailanysty bilim berý bólimderiniń basshylaryn taǵaiyndaý protsedýrasy ózgeredi. Endi olardy ákimder emes oblystyq bilim berý basqarmalarynyń basshylary taǵaiyndaidy», - dedi Bibigúl Asylova vedomstvonyń apparat jinalysynda.
Onyń atap ótýinshe, bilim berý salasyn basqarýdyń jańa júiesin engizý barysyndaǵy zańnama engizilgen ózgeristerdi odan ary júzege asyrý úshin qazirgi ýaqytta vedomstvo Bilim jáne ǵylym ministrliginiń buiryqtary men zańnamalyq aktileri deńgeiinde normativtik retteý jumystaryn aiaqtaýǵa jaqyn.
«Eń aldymen bul bilim berý basqarmalary men bólimderi arasyndaǵy qyzmetterdi bólý týraly buiryqty bekitý. Qazirgi ýaqytta buiryq jobasy ázirlenip bolyp qaldy jáne osy aptada múddeli memlekettik organdardyń bárine jiberilýi josparlanǵan», - dedi vitse-ministr.
