Koreia Respýblikasynyń Prezidenti Mýn Chje In búgin Aziia-Tynyq muhit óńirindegi basty aqparat agenttikteriniń basshylaryn qabyldady, dep habarlaidy Yonhap agenttigi.
Seýlde OANA (Aziia-Tynyq muhit óńiriniń Jańalyq agenttikteri uiymy) Bas Assambleiasynyń 17-otyrysy ótip jatyr. Soǵan qatysý úshin Ońtústik Koreia astanasyna barǵan 28 eldiń 32 aqparat agenttiginiń ókilderimen kezdesýde Koreia Respýblikasynyń basshysy Korei túbegindegi beibitshilikke turaqty túrde kóńil bólip, úzbei qoldap otyrǵany úshin rizashylyq bildirdi.
Mýn Chje In osy aqparat agenttikteri 2018 jylǵy qysqy Olimpiada oiyndarynan beri beibitshilik protsesterinen keńinen habar taratyp kele jatqanyn, Koreia Respýblikasy men KHDR basshylary sammitiniń úsh raýndyna da, AQSh Prezidenti Donald Tramptyń Korei túbegine jasaǵan saparyna, taǵy basqa da is-sharalarǵa arnalǵan materialdaryn jariialap otyrǵanyn atap kórsetti.
«Sizderdiń nazarlaryńyz ben qoldaýlaryńyz álemniń jańa tarihyn jazýymyzǵa septigin tigizedi dep sanaimyn», - dedi Prezident Mýn.
OANA Prezidenti ári Ázerbaijannyń «AzerTAdj» memlekettik aqparat agenttiginiń bas direktory Aslan Aslanov óz kezeginde uiymnyń 17-otyrysy jýrnalistikadaǵy jańa syn-tegeýrinderge, osy saladaǵy tehnologiialyq innovatsiialarǵa arnalǵanyn tilge tiek etti. Onyń aitýynsha, osy máseleni IT salasynyń lideri atanǵan Ońtústik Koreiada talqylaýdyń qisyny bar.
Aslanov Koreia Respýblikasy basshysynyń Korei túbeginde beibitshilik ornatýyna tileýlestik bildirip, halyqaralyq beibitshilikke qol jetkizý OANA uiymynyń basty mindetteriniń biri ekendigin aitty.
Juma kúni OANA tóraǵalyǵy resmi túrde Koreianyń Yonhap jańalyq agenttigine kóshetinin aita ketken jón. Agenttik aldaǵy úsh jylda osy uiymǵa tóraǵa bolady.
OANA Bas Assambleiasynyń 17-otyrysyna Yonhap basshylyǵynan tys, Xinhua, Kyodo, TASS jáne «QazAqparat» HAA siiaqty aqparat agenttikteriniń ókilderi de kelgen.
Eske salaiyq, Koreia Respýblikasynyń Prezidenti Mýn Chje In biyl 21-23 sáýir kúnderi strategiialyq dialogty odan ári damytý maqsatymen memlekettik saparmen Qazaqstanǵa kelgen edi. Mýn Chje In Nur-Sultanda Memleket basshysy Qasym-Jomart Toqaevpen, QR Tuńǵysh Prezidenti – Elbasy Nursultan Nazarbaevpen kezdesip, Qazaqstan-Ońtústik Koreia biznes-forýmyna qatysqan. Forýmda meditsina, mashina jasaý, azyq-túlik ónerkásibi, infraqurylym, taǵy basqa salalarda 30-dan astam qujatqa qol qoiyldy.
