كورەيا رەسپۋبليكاسىنىڭ پرەزيدەنتٸ مۋن چجە ين بٷگٸن ازييا-تىنىق مۇحيت ٶڭٸرٸندەگٸ باستى اقپارات اگەنتتٸكتەرٸنٸڭ باسشىلارىن قابىلدادى, دەپ حابارلايدى Yonhap اگەنتتٸگٸ.
سەۋلدە OANA (ازييا-تىنىق مۇحيت ٶڭٸرٸنٸڭ جاڭالىق اگەنتتٸكتەرٸ ۇيىمى) باس اسسامبلەياسىنىڭ 17-وتىرىسى ٶتٸپ جاتىر. سوعان قاتىسۋ ٷشٸن وڭتٷستٸك كورەيا استاناسىنا بارعان 28 ەلدٸڭ 32 اقپارات اگەنتتٸگٸنٸڭ ٶكٸلدەرٸمەن كەزدەسۋدە كورەيا رەسپۋبليكاسىنىڭ باسشىسى كورەي تٷبەگٸندەگٸ بەيبٸتشٸلٸككە تۇراقتى تٷردە كٶڭٸل بٶلٸپ, ٷزبەي قولداپ وتىرعانى ٷشٸن ريزاشىلىق بٸلدٸردٸ.
مۋن چجە ين وسى اقپارات اگەنتتٸكتەرٸ 2018 جىلعى قىسقى وليمپيادا ويىندارىنان بەرٸ بەيبٸتشٸلٸك پروتسەستەرٸنەن كەڭٸنەن حابار تاراتىپ كەلە جاتقانىن, كورەيا رەسپۋبليكاسى مەن كحدر باسشىلارى سامميتٸنٸڭ ٷش راۋندىنا دا, اقش پرەزيدەنتٸ دونالد ترامپتىڭ كورەي تٷبەگٸنە جاساعان ساپارىنا, تاعى باسقا دا ٸس-شارالارعا ارنالعان ماتەريالدارىن جارييالاپ وتىرعانىن اتاپ كٶرسەتتٸ.
«سٸزدەردٸڭ نازارلارىڭىز بەن قولداۋلارىڭىز ەلەمنٸڭ جاڭا تاريحىن جازۋىمىزعا سەپتٸگٸن تيگٸزەدٸ دەپ سانايمىن», - دەدٸ پرەزيدەنت مۋن.
OANA پرەزيدەنتٸ ەرٸ ەزەربايجاننىڭ «ازەرتادج» مەملەكەتتٸك اقپارات اگەنتتٸگٸنٸڭ باس ديرەكتورى اسلان اسلانوۆ ٶز كەزەگٸندە ۇيىمنىڭ 17-وتىرىسى جۋرناليستيكاداعى جاڭا سىن-تەگەۋرٸندەرگە, وسى سالاداعى تەحنولوگييالىق يننوۆاتسييالارعا ارنالعانىن تٸلگە تيەك ەتتٸ. ونىڭ ايتۋىنشا, وسى مەسەلەنٸ ٸت سالاسىنىڭ ليدەرٸ اتانعان وڭتٷستٸك كورەيادا تالقىلاۋدىڭ قيسىنى بار.
اسلانوۆ كورەيا رەسپۋبليكاسى باسشىسىنىڭ كورەي تٷبەگٸندە بەيبٸتشٸلٸك ورناتۋىنا تٸلەۋلەستٸك بٸلدٸرٸپ, حالىقارالىق بەيبٸتشٸلٸككە قول جەتكٸزۋ OANA ۇيىمىنىڭ باستى مٸندەتتەرٸنٸڭ بٸرٸ ەكەندٸگٸن ايتتى.
جۇما كٷنٸ OANA تٶراعالىعى رەسمي تٷردە كورەيانىڭ Yonhap جاڭالىق اگەنتتٸگٸنە كٶشەتٸنٸن ايتا كەتكەن جٶن. اگەنتتٸك الداعى ٷش جىلدا وسى ۇيىمعا تٶراعا بولادى.
OANA باس اسسامبلەياسىنىڭ 17-وتىرىسىنا Yonhap باسشىلىعىنان تىس, Xinhua, Kyodo, تاسس جەنە «قازاقپارات» حاا سيياقتى اقپارات اگەنتتٸكتەرٸنٸڭ ٶكٸلدەرٸ دە كەلگەن.
ەسكە سالايىق, كورەيا رەسپۋبليكاسىنىڭ پرەزيدەنتٸ مۋن چجە ين بيىل 21-23 سەۋٸر كٷندەرٸ ستراتەگييالىق ديالوگتى ودان ەرٸ دامىتۋ ماقساتىمەن مەملەكەتتٸك ساپارمەن قازاقستانعا كەلگەن ەدٸ. مۋن چجە ين نۇر-سۇلتاندا مەملەكەت باسشىسى قاسىم-جومارت توقاەۆپەن, قر تۇڭعىش پرەزيدەنتٸ – ەلباسى نۇرسۇلتان نازارباەۆپەن كەزدەسٸپ, قازاقستان-وڭتٷستٸك كورەيا بيزنەس-فورۋمىنا قاتىسقان. فورۋمدا مەديتسينا, ماشينا جاساۋ, ازىق-تٷلٸك ٶنەركەسٸبٸ, ينفراقۇرىلىم, تاعى باسقا سالالاردا 30-دان استام قۇجاتقا قول قويىلدى.
