Niý-Iorktegi qazaq politseii Dimash Niiazov óz jumysy jóninde jáne AQSh-ta tártip saqshylaryna para usynǵan jaǵdaida qandai áreket etetini týraly aityp berdi, dep habarlaidy QazAqparat.
«AQSh-ta politsei qyzmetkerleri óte tanymal jáne erekshe qurmetke ie. Degenmen jumys ońai emes, Niý-Iorktiń ózinde resmi 15 mln halyq turady, al resmi emes derekterge súiensek 19 mln adamǵa deiin barady. Niý-Iorkte jalpy sany 35 myń politsiia qyzmetkeri bar. Onyń 60-65% patrýldik qyzmet atqarady. Aptasyna 5 kún, kúnine 8,5 saǵat jumys isteimiz. Ásirese 2020 jyl politseiler úshin aýyr jyl boldy. Ózderińiz biletindei, ótken jyly Niý-Iorkte keń kólemdegi qarsylyq aktsiialary men mitingter jii boldy. Sáikesinshe biz kúsheitilgen rejimde jumys istedik», - dedi D. Niiaz QR Sybailas jemqorlyqqa qarsy is-qimyl agenttiginiń uiymdastyrýymen onlain ótken baspasóz máslihatynda.
Sondai-aq, jerlesimizge AQSh politseileri para alady ma jáne qanshalyqty jii usynady degen suraq qoiyldy.
«Jasyratyny joq, AQSh-ta da politseilerge para usynady. Biraq, munda tártip pen zań qatal jáne politsei para alýdyń arty jaqsylyqqa ákelmeitinin jaqsy túsinedi. Para alǵanyń úshin kez-kelgen sátte jumysyńnan airylyp qalýyń múmkin. Sondai-aq, bizde barlyq jerde beinebaqylaý kamerasy ornatylǵan, iaǵni bizdiń de turǵyndardyń da árbir qadamy beinejazbaǵa túsiriledi. Demek saǵan para bergen ýaqytta syrttan kimniń túsirip turǵanyn bilmeisiń. Maǵan jumys kezinde aqsha usynǵandar boldy. Men ondai sátte zańǵa súienemin de bolmaitynyn túsindirip aitamyn. Keide tártip saqshysy retinde azamattarǵa kómektesken sátte, olar óz rizashylyǵyn bildirip aqsha usynyp jatady. Ol para emes, jai ǵana alǵys, soǵan qaramastan biz bas tartamyz. Bul bizdiń kásibi etika bolyp sanalady», - deidi ol.
Onyń aitýynsha, Amerikada politsei qyzmetkerine talap qatań jáne olarǵa tolyqtai áleýmettik jaǵdai jasalǵan. Bul tártip saqshylarynyń sybailas jemqorlyq áreketter jasamaýynyń negizgi sebebi.
