Búgin Bas Assambleianyń otyrysyna orailastyrylǵan BUU-nyń 75 jyldyq mereitoiyna arnalǵan is-shara ótedi, dep habarlaidy The Guardian basylymy.
Biylǵy assambleia jyldaǵydan erekshe bolmaq – pandemiiaǵa jáne AQSh biligi engizgen sharalarǵa bailanysty álem kóshbasshylary Niý-Iorkke kelmeidi. Onyń ornyna olar 22 qyrkúiek kúni bastalatyn debatqa beineúndeý joldaidy. Buǵan deiin Amerika biligi Niý-Iorkke kelgisi kelgen ár adamdy 14 kúndik karantinge jatqyzý qajettigin habarlaǵan.
«COVID-19 pandemiiasy – daǵdarys jáne ol ómirimizdegi eshbir daǵdarysqa uqsamaidy, sol sebepti biylǵy Bas assambleianyń sessiiasy da basqalarynan erek» dep málimdedi baspasóz konferentsiiasy kezinde BUU bas hatshysy Antonio Gýtterish.
Gýtterish koronavirýsqa qarsy vaktsina jasaý men ekologiia úshin kúresýge basymdyq berý kerek dedi:
«Jańa koronavirýsqa qarsy vaktsina jasaý jáne atmosferaǵa taraityn kómirqyshqyl gazynyń kólemin azaitý – halyqaralyq qaýymdastyq jaqyn ýaqytta ainalysatyn eń mańyzdy máseleler».
Buǵan deiin habarlanǵandai, BUU Bas assambleiasynyń jumysyna Qazaqstan Prezidenti Qasym-Jomart Toqaev ta qatysyp, aǵylshyn tilinde eki beineúndeý jasaidy. Onyń biri - uiymnyń 75 jyldyǵyna arnalsa, ekinshisi – kún tártibindegi debatqa qatysty.
Diplomattar men sholýshylardyń pikirinshe, bul jolǵy assambleia uiymnyń mereitoiynan bólek, qashyqtan ZOOM-diplomatiia túrinde ótetinimen erekshelenedi.
Búgin merekelik bólimdegi shaǵyn resmi rásimde Antonio Gýtterish shtab-páterde bolyp, sóz sóileidi. Mereitoilyq sessiia «Biz qalaityn bolashaq, bizge qajet Birikken Ulttar Uiymy: mýltilateralizmge ujymdyq beiildiligimizdi naqtylaý» degen uranmen ótedi.
