Ministrlik bul Niý-Iork sotynyń Hrapýnovqa aqshalai sanktsiialar salýynyń ekinshi kezi ekenin eske saldy. Birinshisi internet arqyly qupiia aiǵaqtar jariia etilgennen keiin salynǵan edi. Sonymen qatar, sot jaýapkerlerdiń sot protsesin buzǵandyǵyn kem degende altynshy ret rastaýy bolyp sanalady.
Osyǵan uqsas teris qylyqtar úshin Hrapýnovtyń birlesken jaýapkeri Muhtar Ábliazovqa buryn 140 115,60 AQSh dollary mólsherinde sanktsiia salynǵan bolatyn.
Osy aptada qabyldanǵan buiryq Hrapýnovqa salynǵan sanktsiialardyń mólsherin belgiledi jáne bitimgershilik sýdiasy Ketrin Parkerdiń 2020 jylǵy 19 mamyrdaǵy sheshiminiń jalǵasy bolyp tabylady.
"Bul sheshimdi Okrýgtik sýdia Elison Dj. Natan qoldady. Ol, óz kezeginde, buǵan deiin BTA Bankiniń jáne Almaty qalasy ákimdiginiń Ábliazovqa, Hrapýnovqa jáne Triadou SPV S.A. jalǵan kompaniiasynyń AQSh-ta ondaǵan million AQSh dollaryn jylystatqany úshin qoiǵan talaptary úshin úlken mańyzy bar dáleldemelerdi tabýyna Ábliazovtyń, Viktor jáne Ilias Hrapýnovtardyń kedergi keltirgenin anyqtaǵan", - delingen habarlamada.
Ministrlik málimetinshe, sot jaýapkerlerdiń aiǵaqtardy jasyrǵanyn, dáleldemelerdi ádeii joiǵanyn, jalǵan aiǵaqtar bergenin, sot qaýlylaryn buzǵanyn anyqtady.
Osy aptada qabyldanǵan sheshimde sýdia Parker "BTA Bank" AQ men Almaty qalasy ákimdigi múddelerin bildiretin zańgerler komandasyn maqtap, olardy daiyndalǵan jáne bilikti advokattar dep atady.
Boies Schiller Flexner LLP Basqarýshy seriktesi jáne talapkerlerdiń advokaty Metiý L.Shvarts bylai dep málimdedi: "Almaty qalasy men "BTA Bank" AQ sottyń bul isti muqiiat baqylaýyn baǵalaidy. Muhtar Ábliazov, Iliias Hrapýnov jáne olardyń sybailastary sot protsesine adal qatysýdan birneshe ret bas tartyp, sottyń kóptegen qaýlylaryn buzǵan. Osyǵan qaramastan, olardyń qylmystarynyń dáleli óte kóp. Biz bul dálelderdi Niý-Iork qalasynyń alqabiler sotynyń aldynda usynýdy asyǵa kútemiz.
"Almaty qalasy men BTA Bankiniń atynan Niý-Iork protsesi Muhtar Ábliazovtyń jáne onyń qylmystyq sybailastarynyń urlanǵan aqshany AQSh-ta jylystatqany úshin aiyptaýy boiynsha alty jyldan astam ýaqyt buryn bastalǵan bolatyn. Búkil álem boiynsha sottar anyqtaǵandai, Ábliazov jalǵan nesie berý arqyly BTA bankinen milliardtaǵan dollardy jymqyrǵan. Ol osy is-áreketter úshin Qazaqstanda sottalǵan, sondai-aq Ulybritaniia sottarynda jaýapty dep tanylǵan.
AQSh-taǵy sot talqylaýy barysynda talapkerler Ábliazov qylmystarynyń qosymsha qomaqty dálelderin jinady, sondai-aq osy qylmystardyń kóptegen kýágerleriniń aiǵaqtaryna qol jetkizdi. Negizgi sot protsesiniń bastalýy 2022 jyldyń kúzinde Niý-Iorkte amerikalyq alqabiler sotynyń aldynda ótedi dep josparlanǵan" - delingen habarlamada.
