Niý-Iork shtatynyń gýbernatory Endriý Kýomony uiatty áreket jasaǵany úshin taǵy bir áiel aiyptady. Bul týraly The New York Times gazeti habarlady.
Basylymnyń 33 jastaǵy Anna Rýhtyń sózin jazǵan. Ondaǵy málimetke sai, oqiǵa 2019 jyldyń qyrkúiek aiynda, onyń dostarynyń úilený toiynda oryn alǵan. Bul toida Kýomo da bolǵan. Áieldiń aitýynsha, Niý-Iork gýbernatory onyń qasyna kelip, bir-eki aýyz sóz aityp, belinen qushaqtaǵan. Áieldiń qarsylyq tanytqanynyna qaramastan, Kýomo onyń betine qolyn qoiyp, erninen súimek boldy.
Rýh gýbernatordyń bul áreketinen ózin yńǵaisyz sezingenin aitqan. The New York Times-tiń jazýynsha, Kýomonyń kelispeitin qylyq tanytqanyn Rýhtyń sol kúni óz dostaryna jibergen habarlamalary rastap otyr.
Buǵan deiin Kýomonyń buryn qaramaǵynda jumys istegen eki qyzmetker Sharlotta Bennet pen Lindsi Boilan basshysy qyryndaǵanyn jariialady. Bennet Kýomoǵa qatysty aiybyn senbi kúni aitsa, Boilan bul týraly 2020 jyldyń jeltoqsanynda aitqan bolatyn. Gýbernator bolsa, eki oqiǵaǵa qatysyn joqqa shyǵaryp otyr.
Bul Niý-Iork gýbernatorynyń qatysýymen bolǵan birinshi janjal emes. Buǵan deiin AQSh-tyń federaldyq biligi men Niý-Iorktiń Brýklin aýdanynyń prokýratýrasy byltyr kóktemde jáne jazda qarttar úiinde koronavirýsqa shaldyǵý saldarynan qaitys bolǵan adamdar sanyn jasyrý kúdigine ilingen Kýomo ákimshiligine qatysty tergeý amaldaryn bastaǵan edi.
