Berlindegi "Sharite" klinikasynda emdelip jatqan reseilik oppozitsiialyq saiasatker Aleksei Navalnyi ózine "ý berý isin" Resei tarabymen birigip tergeýdi usynǵan Germaniia prokýratýrasynyń usynysyna qarsy bolǵan. Bul týraly Germaniianyń qaýipsizdik organyndaǵy joǵary laýazymdy resmi tulǵaǵa súiengen The New York Times basylymy habarlady.
Basylymnyń aqparat kóziniń aitýynsha, jaqynda ǵana komadan turǵan Navalnyi "esin tolyq jiǵan, óz jaǵdaiynan tolyq habardar".
Dúisenbi kúni Frantsiia men Shvetsiianyń táýelsiz zerthanalary da Navalnyiǵa "Novichok" tobyna jatatyn qaýipti ý bergen degen býndesver mamandarynyń qorytyndysyn rastaǵan edi. Osy aqparat shyqqannan keiin birneshe saǵat ótken soń Germaniia prokýratýra ókilderi Navalnyimen kezdesken.
Navalnyidan alynǵan taǵy bir synama úlgisi jaqyn kúnderi Himiialyq qarýǵa tyiym salý jónindegi uiym sarapshylarynyń zerthanasynda tekseriledi.
22 tamyzda Ombydan Berlindegi "Sharite" klinikasyna aýystyrylǵan Navalnyidyń qaýipsizdigi kúsheitilgen. Onyń densaýlyǵy barǵan saiyn jaqsaryp keledi, qazir oǵan jasandy tynys alý apparatynyń kómegi qajet emes, tósekten ózdigimen turyp, júre alady. Klinika taratqan sońǵy málimet osyndai.
Germaniianyń qaýipsizdik organynyń ókili basylymǵa Navalnyi jazylǵannan keiin Reseige oralatynyn aitqan. "Ol Germaniiada qalmaidy. Úiine, Reseige oralyp, qyzmetin jalǵastyrǵysy keledi" dedi aqparat kózi.
Ázirge reseilik saiasatker ne onyń ókili amerikalyq basylymda jazylǵan málimetke túsinikteme bermedi.
