Izrail Ýkrainaǵa Irannyń "Shahid-136" kamikadze-dronyn atyp qulatýǵa kerekti barlaý málimetterin bergen. Muny jazǵan The New York Times gazeti Ýkrainanyń aty atalmaǵan sheneýnigine súiengen, dep habarlaidy Azattyq.
Sheneýnik basylymmen áńgime kezinde Izrail Iran drondaryn kózdeýge paidaly málimetter bergenin aitqan. Izrail de, Ýkraina da bul jóninde resmi aqparat taratpaǵan.
Ótken aptada Ýkraina biligi Izrailden baiyrǵy qarsylasy Iran drondaryn joiatyn áýe qorǵanysy júiesin suraǵan. Izrail qorǵanys ministri Benni Gants bas tartqanymen, áýe shabýylyn aldyna ala eskertetin qural jetkizýge ýáde bergen.
Britaniiada ornalasqan, "Adam quqyǵyna monitoring jasaityn Siriia ortalyǵy" Izrail 21 qazanda Siriiaǵa soqqy jasap, Iran drondary shyǵatyn tsehty joiǵanyn habarlaǵan. Alaida muny rastaityn táýelsiz aqparat joq.
Máskeý men Tegeran Irannyń Reseige dron bergenin joqqa shyǵaryp keledi. Biraq keiingi kezderi Resei áskeri Ýkrainada qoldanyp júrgen "Geran-2" drondary shyn máninde Irannyń "Shahid-136" drondary ekeni málim bolǵan. Resei bul drondarymen Ýkrainanyń iri qalalarynyń azamattyq nysandaryn atqan.
Ulybritaniia qorǵanys ministrliginiń barlaý qyzmeti 24 qazanda Ýkraina kamikadze drondardyń 85 paiyzyn atyp túsirip jatqanyn habarlady. Ýkraina áskeri barlaý qyzmetiniń basshysy Kirill Býdanov "Ýkrainskaia pravda" gazetine bergen suqbatynda Resei drondarynyń 70 paiyzyn atyp túsirý múmmikn bolyp turǵanyn málimdegen. Onyń sózinshe, Resei Irannan 1700 dron alatyn bolyp kelisken, onyń 600-ge jýyǵy jetkizilgen, 300-ge jýyǵy qazirdiń ózinde qoldanylǵan.
