Májilis tóraǵasy Nurlan Nyǵmatýlin zymyran tasyǵyshtardyń apaty saldarynan bolǵan ekologiialyq zalaldy óteýdiń naqty tetigin ázirleý qajet dep sanaidy, dep habarlaidy "Ult aqparat".
Májilistiń jalpy otyrysynda Qazaqstan men Resei arasyndaǵy «Baiqońyr» ǵarysh ailaǵynan soltústik baǵytta poliarly orbitaǵa ǵarysh apparattaryn ushyrý úshin «Soiýz-2» tipti zymyran-tasyǵyshtardy ushyrýdy júzege asyrý jónindegi yntymaqtastyq týraly kelisimdi ratifikatsiialaý týraly zań jobasyn talqylaý barysynda depýtattar ekologiiany qorǵaý jáne «Soiýz-2» tipti zymyran-tasyǵyshtardyń shtattan tys qulaýy nemese avariiasy saldarynan materialdyq zalaldy óteý máselesin kóterdi.
Zań jobasyn talqylaý barysynda Májilis tóraǵasy ziian keltirilgeni qandai qujattar arqyly anyqtalatynyn surap, oǵan Syrtqy ister vitse-ministri Marat Syzdyqov túsindirgendei, jeke kelisim bar, oǵan sáikes Resei tarapy zalaldy tóleýge kepildik alady, biraq tájiribe kórsetkendei, bul rásim uzaq jyldarǵa sozylady.
Osyǵan bailanysty Nurlan Nyǵmatýlin ekologiialyq zalaldy óteý tetigi tiisti qujattarda bekitilýi tiis dep esepteidi.
«Biz seriktesterimizben materialdyq zalaldy óteý týraly naqty kelisýimiz kerek. Bizde kepildik bar. Biraq bul kepildikter jumys isteýi úshin ne qajet? Bul birlesken qujat bizdiń seriktesterimizben pysyqtalýy tiis», - dedi Nurlan Nyǵmatýlin zań jobasyn ázirleýshilerge.
Óz kezeginde zań jobasyn ázirleýshiler, Tsifrlyq damý, innovatsiialar jáne aeroǵarysh ónerkásibi ministrligi másele jaqyn arada pysyqtalyp, nátijesi depýtattarǵa usynylady dep sendirdi.
