Búgin Parlament Májilisiniń jalpy otyrysynda depýtattar azamattardyń jekelegen sanattaryn áleýmettik qorǵaý týraly zań jobasyn maquldady. Qujatta 7 men 16 jas arasyndaǵy múgedek balalardy qaita qarap, kýálik berý máselesi kózdelgen, dep habarlaidy "Ult aqparat" tómengi palatanyń baspasóz qyzmetine silteme jasap.
Májilis Tóraǵasy Nurlan Nyǵmatýlinniń pikirinshe, endi ata-analar balalarynyń múgedektigin dáleldeý úshin kabinet jaǵalap, qujat jinamai, tsifrlyq tehnologiianyń tiimdiligin qoldaný qajet. Balalardyń múgedektik sanatyn anyqtaý rásimi jeńildetilgen jáne proaktivti túrde júrgizý kerektigin aitqan Nurlan Nyǵmatýllin Eńbek jáne halyqty áleýmettik qorǵaý ministrligin Densaýlyq saqtaý ministrligimen birlesip, is-qimyl josparyn jasaý qajettigine nazar aýdardy. Onyń aitýynsha, ata-analar tarapynan narazylyq boldyrmaý úshin aqparattyq júielerdiń barlyq integratsiialyq protsesterin tez aiaqtap, barlyq qol jetimdi tsifrlyq tehnologiialardy qoldaný tiis. Sondai-aq, Májilis Tóraǵasy osynyń barlyǵyn halyqqa durys túsindirý kerektigin aityp, ol úshin tiisti zańnamalyq sharalar qabyldanǵanyn jetkizdi. Aita ketý kerek, Zań jobasynda 1-toptaǵy múgedekterge kútim jasaityn adamdarǵa 1,4 eń tómen kúnkóris deńgeii mólsherinde járdemaqy engizý; múgedek balalarǵa múgedektigi boiynsha jáne asyraýshysynan aiyrylý jaǵdaiy boiynsha járdemaqylardy bir mezgilde alý quqyǵyn berý, bul múgedek balalary bar jáne asyraýshysynan aiyrylǵan otbasylardyń kirisin arttyrýǵa múmkindik beredi (norma 2 myńnan astam adamǵa áser etedi); sondai-aq, múgedek bala tárbielep otyrǵan otbasylarǵa memlekettik turǵyn úi qorynan turǵynjai alý kezektiligin bala 18 jasqa tolǵan jaǵdaida da saqtaý kózdeledi.
