Búgin Májilis spikeri Nurlan Nyǵmatýlinniń tóraǵalyǵymen palatanyń jalpy otyrysy ótti. Onda depýtattar sybailas jemqorlyqqa qarsy is-qimyl máseleleri týraly zań jobasyn birinshi oqylymda maquldady, dep habarlaidy "Ult aqparat" Májilistiń baspasóz qyzmetine silteme jasap.
Májilis tóraǵasy atap ótkendei, zań jobasyna engizilgen jańa túzetýler arqyly aǵymdaǵy jyly Parlament sessiiasynyń ashylýynda Memleket basshysy Qasym-Jomart Toqaevtyń tapsyrmasy júzege asyryldy.
-
- Osy maquldanǵan Zań jobasy elimizdiń ashyq jáne turaqty damýy jolyndaǵy taǵy bir mańyzdy qadam deýge bolady. Sebebi, árbir demokratiialyq damyǵan elde sybailas-jemqorlyqqa jol joq. Sondyqtan, tikelei Memleket basshysy Qasym-Jomart Kemeluly Toqaevtyń tapsyrmasymen ázirlengen osy zań jobasy jemqorlyqpen kúresti odan ári kúsheitýge baǵyttalyp otyr. Osy jolda zań jobasyna jemqorlyqpen kúresti júieli túrde júrgizýge arnalǵan kóptegen ózgerister engizildi. Onyń basty maqsaty - kez kelgen zań buzýdyń aldyn-alý jáne boldyrmaý, – dedi Nurlan Nyǵmatýlin.
Májilis depýtattary Memleket basshysynyń tapsyrmasyna sáikes, qylmystyń kez kelgen túrin arandatqany úshin qylmystyq jaýapkershilikti sybailas jemqorlyqqa qarsy organ qyzmetkerlerine ǵana emes, jalpy kez kelgen quqyq qorǵaý organdarynyń qyzmetkerlerine belgileýdi usyndy.
Bas prokýratýranyń, Sybailas jemqorlyqqa qarsy is-qimyl agenttiginiń, Ishki ister jáne qarjy ministrlikteriniń ókilderi depýtattardyń bul usynysymen kelisip, qujat jobasy ekinshi oqylymǵa deiin pysyqtalatyn bolady.
Sonymen qatar, búgingi jalpy otyrysta Májilis depýtattary kótergen taǵy bir másele óz sheshimin tapty. Ol jóninde Májilis tóraǵasy Nurlan Nyǵmatýlin:
-
- Endi tek birinshi basshylar ǵana emes, kvazimemlekettik sektorda qyzmet etetin laýazymdy tulǵalar da jemqorlyq úshin jaýapqa tartylatyn bolady. Bul norma boiynsha da Memleket basshysy Qasym-Jomart Kemeluly Toqaevtyń tapsyrmasy júzege asyrylady. Bul ádil jáne durys qadam dep esepteimin. Ony qoldaýymyz kerek, - dedi.
Talqylaýdy qorytyndylaǵan Májilis tóraǵasy osy zań jobasynyń nátijesinde sybailas jemqorlyqqa qarsy kúrestiń tiimdiligi artatynan atap ótti.
Sondai-aq, zań jobasymen quqyq qoldaný praktikasynda týyndaǵan quqyqtyq olqylyqtar men kolliziialardy joiýǵa, sondai-aq sybailas jemqorlyqqa qarsy is-qimyl jónindegi ýákiletti organnyń mártebesi men uiymdyq qyzmetine qatysty máselelerdi retteýge baǵyttalǵan normalar bekitiledi.
Nurlan Nyǵmatýlinniń aitýynsha, osy zań jobasynyń nátijesinde sybailas jemqorlyqqa qarsy kúrestiń tiimdiligi artady.
