Májilis tóraǵasy Nurlan Nyǵmatýlin Eýraziialyq ekonomikalyq odaq aiasynda otandyq kásipkerlerdi qorǵaýy tiis integratsiialyq organdardaǵy sheneýnikterdiń jumysyn synady, dep habarlaidy Sputnik Qazaqstan tilshisi.
Búgin májilistiń jalpy otyrysynda Eýraziialyq ekonomikalyq odaqqa múshe memleketterdiń ónerkásiptik taýarlarǵa qatysty sýbsidiialardy Eýraziialyq ekonomikalyq komissiiamen erikti kelisý tártibi týraly kelisim talqylanǵan bolatyn.
"Meniń oiymsha, ulttyq ekonomika ministrligi Eýraziialyq ekonomikalyq odaq aiasynda otandyq kásiporyndardy qorǵaý úshin bul sýbsidiialardy usynýdy naqty josparlaý kerek. Eýraziialyq ekonomkialyq odaq ishinde básekelestik bar, bul durys, óitkeni bul naryq. Osy suraqpen ainalysatyn bizdiń mamandar bilikti bolýy tiis, tek bizdiń ǵana emes, odaqqa múshe memleketterdiń ekonomika salalarynyń qyr-syryn bilýi kerek. Bizge ministrlikterdiń qurylymdyq bólimderinde ǵana emes, memleketaralyq integratsiialyq organdarda da kásibi mamandar qajet. Biraq, ókinishke qarai, búginde bizdiń sheneýnikter otandyq ónim óndirýshilerdiń quqyǵyn men múddesin tolyq kólemde qorǵap jatyr dep aita almaimyz. Eger bizdiń sheneýnikter osyndai «uiqyly kúide» jumys isteýdi jalǵastyrsa, onda otandyq biznes úlken shyǵyndarǵa ushyraidy", — dedi Nyǵmatýlin.
Májilis tóraǵasy tsement eksportyna qatysty mysal keltirdi. Máselen, qazirgi ýaqytta reseilik kásipkerler bizdiń elimizge jyl saiyn esh kedergisiz 700 myń tonnaǵa jýyq tsement ákeledi. Al qazaqstandyq kompaniialar Reseige bul ónimdi eksporttai almai, túrli qiyndyqqa tap bolǵan. Óitkeni, onyń aitýynsha, integratsiialyq organdardaǵy bizdiń elimizdiń ókilderi Reseide jańa standarttardyń, eksporttalatyn tsementti sertifikattaýdyń jańa tártibiniń engizilýine qatysty ýaqytynda is-sharalardy qolǵa almaǵan.
"Sonda olar nemen ainalysady? Olarǵa memlekettik qarajat, onyń ishinde salyq tóleýshilerdiń, sol biznesmenderdiń esebinen aqsha tóleimiz", — dep atap ótti májilis tóraǵasy.
