Májilis tóraǵasy Nurlan Nyǵmatýlin Densaýlyq saqtaý ministri Aleksei Tsoidy halyqqa jaqyn bolýǵa shaqyrdy, dep habarlaidy "Ult aqparat".
«Okoptan shyǵatyn kez keldi. Qurmetti ministr myrza, halyqtyń muń-muqtajyn tyńdaýǵa shyǵý kerek. Adamdarmen sanitarlyq dárigerdiń qaýlysy arqyly bailanysqandy doǵarý kerek. Aýrýhanaǵa, emhanaǵa baryńyz. Ásirese, aýdandyq meditsinalyq uiymdardy aralyp shyǵyńyz, ondaǵy kezekte turǵan adamdardy tyńdańyz. Meniń oiymsha, sol kezde meditsinalyq kómek sapasy men osy kórsetkishke qol jetkizý jaiynda qajetti málimet alasyz. Jalpy óz jumysyńyz jaiynda halyqtyń pikirin estisiz», - dedi Nyǵmatýlin Májilistiń jalpy otyrysynda.
Spiker ministrge statistikany, Eýropany mysalǵa keltirýdi toqtatyp, halyqpen bailanys ornatýǵa keńes berdi.
«Aleksei Vladimirovich, qazir densaýlyq júiesine ońai tiip jatqan joq, salmaq túsip otyr. Biraq jinaqtalatyn kez jetti. Ortalyq kommýnikatsiialar qyzmetiniń zalynda ǵana bailanys ornatý jetkiliksiz. Qaǵazdan nemese sýflerdan baiandamany oqyp, ketip qalasyz, jýrnalister suraqtarynyń jartysyna da jaýap ala almaidy. Adamdarmen tildesińiz, biz kim úshin eńbek etip júrmiz? Bizdiń sailaýshylarymyz solar ǵoi. El basshylyǵy sizdi qoldady, parlament qoldady, aqsha bólinip jatyr, jumys isteitin ýaqyt keldi», - dedi Nyǵmatýlin.
