Májilis tóraǵasy Nurlan Nyǵmatýlin palata depýttarynyń atynan Qyzylorda oblysynda oryn alǵan oqiǵa saldarynan qaza bolǵan áskeri qyzmetshilerdiń otbasylary men jaqyndaryna kóńil aitty, dep habarlaidy "Ult aqparat".
«Qyzylorda oblysynda qaiǵyly oqiǵa oryn aldy. Jaýyngerlik mindetin atqarý barysynda 13 áskeri qyzmetshi kóz jumdy. Osy qaiǵyly jaǵdaiǵa bailanysty barlyq depýtattardyń atynan tik ushaq apatynan kóz jumǵan jaýyngerlerdiń otbasylaryna, týǵan-týystaryna qaiǵyryp kóńil aitamyz», - dedi Palata spikeri.
Biýro otyrysynda Májilistiń aldaǵy jalpy otyrystyń kún tártibiniń jobasy qaraldy.
Palataǵa birinshi oqylymda turǵyn úi-kommýnaldyq sharýashylyq máselelerine qatysty zań jobasyn qaraý usynylady.
Zań jobasy kondominiým obektilerin basqarý jáne kútip-ustaý boiynsha qyzmetti, ony resimdeý tártibin, ortaq múlikti kúrdeli jóndeý úshin aqsha qarajatyn jinaýǵa, osy protsesterge menshik ieleriniń ózderiniń qatysýyn, onyń ishinde jergilikti atqarýshy organdardyń turǵyn úi inspektsiiasyn tartýǵa baǵyttalǵan.
Sonymen qatar, depýtattardyń talqylaýyna «Bir taraptan Eýraziialyq ekonomikalyq odaq pen oǵan múshe memleketter jáne ekinshi taraptan Qytai Halyq Respýblikasy arasyndaǵy saýda-ekonomikalyq yntymaqtastyq týraly kelisimdi ratifikatsiialaý týraly» zań jobasy usynylady.
Kelisim QHR-men anaǵurlym tyǵyz saýda-ekonomikalyq áriptestikke birtindep jyljý úshin negiz bolýǵa tiis. Kelisim aqparat almasýdy damytý, kedergilerdi anyqtaý jáne Qytaimen ózara saýdany ilgeriletý quraly bolýǵa arnalǵan, sondai-aq qosymsha áleýetti yntymaqtastyq salalaryn izdeýge yqpal etetin bolady.
