Májilis tóraǵasy Nurlan Nyǵmatýlin depýtattyń saýalyna naqty jaýap bermegen QR eńbek jáne áleýmettik qorǵaý ministri Mádina Ábilqasymovaǵa ashýlandy. Onyń sózin bólip, biryńǵai jiyntyq tólem men zeinetaqyǵa qatysty kez kelgen saýaldyń jaýaby halyq úshin mańyzdy ekenin eskertti, dep habarlaidy Sputnik Qazaqstan tilshisi.
"Zań jobasyna sáikes, qalada biryńǵai jiyntyq tólem mólsheri 1 AEK, al aýyldyq jerlerde 0,5 AEK quraidy. Árine, aýyldyń qamyn oilap otyrǵandyqtan osylai belgilegenderińizdi túsinemiz. Alaida bul keiin zeinetaqy mólsherine aitarlyqtai áser etip júrmei me? Ekinshiden, aýylda tirkelse de, qalada jumys istep júrgen azamattar biryńǵai jiyntyq tólemdi qansha kólemde tóleidi? " — dep surady májilistiń jalpy otyrysynda depýtat Jámilá Nurmanbetova.
Mádina Ábilqasymova AEK mólsheriniń qansha teńge ekenine toqtaldy. Iaǵni 2019 jyldyń 1 qańtarynan bastap 1 AEK 2 525 teńgeni quraidy. Sondai-aq, ol AEK mólsheri aýyldyq jerlerdegi azamattardyń tabysyn eskergendikten osylai belgilenip otyrǵanyn túsindirip ótti.
"Qalada biryńǵai jiyntyq tólemdi frilanser, taksi júrgizýshisi, úi sharýasynda jumys isteitin nemese tehnikany jóndeýmen ainalysatyn azamattar óz betinshe tóleidi. Jeke kásipker retinde de tirkelip tólep jatady. Bul nárse meditsinalyq saqtandyrý úshin de mańyzdy", — dedi ministr.
Ministrdiń sózin májilis tóraǵasy Nurlan Nyǵmatýlin bólip, depýtat qoiǵan saýalǵa naqty jaýap berýin ótindi.
"Mádina Erasylqyzy, depýtat naqty, meniń oiymsha, óte ózekti saýal qoidy. Muny halyq bilýi kerek. Al siz zań jobasynyń jalpy qurylymyna ketip qalyp jatyrsyz. Ony biledi ekensiz, kórip turmyz! Suraqqa jaýap berińizshi. Bul nárse erteńgi kúni qala men aýyl turǵyndarynyń zeinetaqysynda aitarlyqtai aiyrmashylyq bolady degen sóz be? Eger azamat aýylda tirkelgen bolsa jáne qalada jumys istese, ol qai sanatqa jatady? Qala ma? Aýyl ma? Saýal men sizdiń jaýabyńyzdyń arasynda aiyrmashylyq kórip otyrsyz ba? Biz sizden ótinip suraimyz, naqty suraqqa naqty jaýap berińizshi", — dep ashýlandy májilis tóraǵasy.
Eńbek ministriniń aitýynsha, azamat biryńǵai jiyntyq tólemdi qai jerge tirkelgenine bailanysty tóleidi. Mysaly, qalada turyp, aýylda tirkelgen bolsa, ol báribir 0,5 AEK mólsherinde tóleidi. Al qai jerde tirkelgeni JSN nómiri boiynsha anyqtalady.
"Zeinetaqy mólsheri adamnyń ótiline qarai anyqtalady. Iaǵni somada aitarlyqtai aiyrmashylyq joq. Kimniń qansha alatyny ózine bailanysty. Sondai-aq, jeke salymdary bolsa, bul zeinetaqy mólsherin belgileitin kezde mindetti túrde eskeriledi", — dedi Mádina Ábilqasymova.
Bul joly májilis tóraǵasy ministrdiń jaýabyna qanaǵattanyp, birden osylai jaýap berýi kerektigin eskertti.
