Májilis tóraǵasy Nurlan Nyǵmatýlin Ózbekstan Olii Majlisi Zań shyǵarýshy palatasy tóraǵasynyń orynbasary Borii Alihanov bastaǵan Ózbekstannyń parlamenttik delegatsiiasyn qabyldady, dep habarlaidy "Ult aqparat" Májilistiń baspasóz qyzmetine silteme jasap.
N. Nyǵmatýlin atap ótkendei, Ózbekstan Ortalyq Aziiadaǵy Qazaqstannyń mańyzdy strategiialyq seriktesi bolyp tabylady jáne eki el arasyndaǵy dostyq pen yntymaqtastyq saiasaty budan ári tereńdei túspek.
Májilis tóraǵasynyń aitýynsha, elderdiń ózara bailanysynyń keńeiýine jańa serpin bergen Qazaqstan men Ózbekstan prezidentteri Nursultan Nazarbaev pen Shavkat Mirzieevtyń memlekettik saparlary boldy. Memleket basshylarynyń kezdesýi nátijesinde strategiialyq seriktestikti odan ári tereńdetý jáne tatý kórshilikti nyǵaitý týraly Birlesken deklaratsiiaǵa qol qoiyldy.
N.Nyǵmatýlin Ózbekstannyń eki palataly Parlamentiniń qyzmetinde ózbek depýtattarynyń alǵashqy sapary ekijaqty qarym-qatynastardy odan ári damytýǵa oń yqpal etetinine senim bildirdi. Sonymen qatar, Májilis tóraǵasy elimizdiń halyqaralyq arenadaǵy bastamalaryna, atap aitqanda 2017-2018 jyldardaǵy BUU QK músheligi, Astanada ótken EKSPO-2017 kórmesine qoldaý kórsetkeni úshin alǵys bildirdi.
Sonymen qosa Ózbekstannyń parlamenttik delegatsiiasyn Májilistiń qyzmetimen tanystyryp, Qazaqstan Respýblikasy Prezidentiniń «Qazaqstan-2050» Strategiiasynda jáne Qazaqstannyń úshinshi jańǵyrýy mindetterin oryndaý boiynsha atqarylǵan jumystar týraly aitty.
Taraptar áńgimelesý barysynda parlamentaralyq yntymaqtastyq toptarynyń áleýetin belsendi paidalanýǵa, sondai-aq, Palatalardyń beiindi komitetterimen tyǵyz qarym-qatynasta jumys isteýge shaqyrdy.
Jalpy Parlamentaralyq yntymaqtastyq toptarynyń birinshi birlesken otyrysynyń kún tártibi saýda-ekonomikalyq jáne mádeni-gýmanitarlyq ózara is-qimyl, sý resýrstaryn basqarý máselelerin talqylaýǵa arnaldy.
Ózbekstannyń parlamenttik delegatsiiasy sapar barysynda Qyzylorda jáne Ońtústik Qazaqstan oblystaryna barýdy josparlaǵan.
