QR Parlamenti Májilisiniń tóraǵasy Nurlan Nyǵmatýlin men «Atameken» UKP Tóralqasynyń tóraǵasy Timýr Qulybaev 2020 jylǵa arnalǵan QR Parlamentiniń Májilisindegi «Nur Otan» partiiasynyń fraktsiiasy men «Atameken» Ulttyq kásipkerler palatasy yntymaqtastyǵynyń Jol kartasy memorandýmyna qol qoidy, dep habarlaidy "Ult aqparat".
Depýtattyq korpýs otandyq biznes-qaýymdastyqtyń múddesine qatysty zań jobalaryn qaraý barysynda «Atameken» Ulttyq palatasymen tyǵyz jumys isteidi.
Elimizde kásipkerlikti damytýdyń mańyzdylyǵyna toqtalǵan Palata spikeri Nurlan Nyǵmatýlin Qazaqstannyń Tuńǵysh Prezidenti – Elbasy Nursultan Nazarbaev pen Memleket basshysy Qasym-Jomart Toqaevtyń airyqsha qoldaýymen elimizde biznes salasynyń qarqyndy damyp kele jaqanyn atap ótti.
Májilis tóraǵasy 2017 jyly «Nur Otan» partiiasy men «Atameken» UKP arasyndaǵy 2017-2018 jyldarǵa arnalǵan Qazaqstan Úkimetiniń zań jobalaý jumys josparlary aiasynda yntymaqtastyq týraly Memorandým jóninde Jol kartasyna qol qoiylǵanyn, ondaǵy qoiylǵan maqsattardyń oryndalǵanyn jetkizdi.
«Endi jańa qujatqa sáikes, Májilis depýtattary men kásipkerler qaýymdastyǵy aldaǵy jyly 9 mańyzdy baǵyt boiynsha jumysty jalǵastyrady. Atap aitqanda, biznesti qorǵaý jáne sybailas jemqorlyqqa qarsy is-qimyl, salyq jáne biýdjet zańnamasyn jetildirý, memlekettik satyp alýlar, otandyq taýar óndirýshilerdi qoldaý, sáýlet, qala qurlysy jáne qurylys qyzmeti men jer qatynastary salasyndaǵy máselelerdi sheshý, óńirlik damý – aýylda biznesti damytý, biznestiń tutynýshylar aldyndaǵy jaýapkershiligin kúsheitý jáne memlekettik-jekemenshik áriptestik, adam kapitalyn damytý. Bizdiń aldymyzda eldegi biznes ahýaldy damytý boiynsha óte mańyzdy mindetter tur, olardy mejeli ýaqytta júzege asyrýymyz kerek», - dedi N. Nyǵmatýlin.
