Májilis tóraǵasy Nurlan Nyǵmatýlin Belgiia Koroldiginiń Federaldyq Parlamenti Ókilder palatasynyń spikeri Elian Tiliomen beinekonferentsiia formatynda kezdesý ótkizdi, dep habarlaidy "Ult aqparat" tómengi palatanyń baspasóz qyzmetine silteme jasap.
Taraptar eki el arasyndaǵy yntymaqtastyqty, onyń ishinde parlamentaralyq bailanysty arttyrý jaiynda pikir almasty.
Nurlan Nyǵmatýlin Belgiia Qazaqstannyń Eýropadaǵy mańyzdy saiasi jáne ekonomikalyq áriptesi ekenine nazar aýdara otyryp, eki el arasyndaǵy strategiialyq seriktestik deńgeiine jetýdegi Tuńǵysh Prezident – Elbasy Nursultan Nazarbaevtyń rólin atap ótti.
Sonymen qatar, kezdesýdegi negizgi taqyryptardyń biri – Memleket Basshysy Qasym-Jomart Toqaev bastamashy bolǵan eldiń saiasi júiesin jańǵyrtý máseleleri týraly boldy.
Nurlan Nyǵmatýlin memleket pen qoǵam arasyndaǵy dialogty keńeitý, sondai-aq osy baǵyttaǵy qazaqstandyq zańnamany jetildirý týraly aitty.
Taraptar Qazaqstan-Belgiia qarym-qatynastarynyń mańyzdy quramdas bóligi retinde parlamentaralyq bailanysty jandandyrýdy qoldady.
Óz kezeginde Elian Tilio Qazaqstandy óziniń damý jolyn usynǵan memleket ekenin, búgingi tańda qarqyndy túrde damyp kele jatqanyn alǵa tartty. Sonymen qatar, qos memleket arasyndaǵy diplomatiialyq qatynastyń ornaǵanyna 30 jyl tolatynyn atap ótip, qalyptasqan saiasi-ekonomikalyq bailanysty odan ári nyǵaitýǵa nietti ekenin jetkizdi.
Otyrys barysynda Nurlan Nyǵmatýlin men Elian Tilio zańnamalyq tájiribe almasý, yntymaqtastyq jónindegi parlamenttik toptar men komitetterdiń ózara is-qimyly eki eldiń jan-jaqty áriptestigin ilgeriletýge yqpal etetinine senim bildirdi.
