Búgin jetinshi shaqyrylǵan Parlament Májilisiniń birinshi sessiiasynyń sońǵy jalpy otyrysy ótti. Osyǵan orai, Májilis tóraǵasy Nurlan Nyǵmatýlin ótken sessiia jumysyn qorytyndylady, dep habarlaidy "Ult aqparat".
«Bul Májilis pen depýtattyq korpýs úshin mańyzdy kezeńderdiń biri. Osy sessiia óz jumysyn qasietti Táýelsizdigimizge 30 jyl tolǵan tarihi kezeńde bastady. Erekshe aitý kerek, osy shaqyrylymda Májilis quramy jańaryp, elge tanymal bilikti tulǵalarmen tolyqty.
Osy sessiiadaǵy jańa jáne naqty qadamdar Májilistiń zań shyǵarý jumysyn odan ári kúsheitýge jol ashty. Sonyń nátijesinde, Májilis saiasi, áleýmettik, ekonomikalyq mańyzy zor kóptegen zańdardy qabyldady. Kóptegen parlamenttik is-sharalar uiymdastyryldy. Bul jolda biz, Elbasy Nursultan Ábishuly Nazarbaevtyń Strategiialyq bastamalaryn jáne Memleket basshysy Qasym-Jomart Kemeluly Toqaevtyń alǵa qoiǵan mindetterin basshylyqqa aldyq. Onyń barlyǵy, halqymyzdyń ómir sapasyn arttyrýǵa, elimizdiń turaqty damýyn zań deńgeiinde qamtamasyz etýge yqpal etti», - dedi Májilis tóraǵasy Nurlan Nyǵymatýlin palatanyń jalpy otyrysynda.
Onyń aitýynsha, sessiia barysynda depýtattar ózderiniń zań shyǵarýshylyq bastamalaryn belsendi qoldanyp, 10 zań jobasyn ázirlep shyqty.
Sonymen qatar, osy sessiiada 230-dan asa depýtattyq saýal joldandy. Olar indýstriialyq-innovatsiialyq damý, qarjy, bilim berý, densaýlyq saqtaý, áleýmettik qorǵaý jáne aimaqtyq damý máselelerine baǵyttaldy.
Palata spikeri sessiia aiaqtalǵanymen depýtattar óńirlerge, shalǵaidaǵy aýyldyq jerlerge baryp, sailaýshylarmen kezdesetinin atap ótti.
