Búgin Palata Spikeri Nurlan Nyǵmatýlinniń tóraǵalyq etýimen Májilis Biýrosynyń keńeitilgen otyrysy ótti. Onda Memleket Basshysy Nursultan Ábishuly Nazarbaevtyń «Nur Otan» partiiasynyń XVIII Sezinde jariialaǵan mańyzdy bastamalaryna airyqsha nazar aýdaryldy.
Elbasynyń az qamtylǵan turǵyndardy áleýmettik qoldaý, baspana máselesin sheshý, bilim jáne densaýlyq salalaryn jaqsartý, óńirlerdi keshendi damytýǵa baǵyttalǵan aýqymdy bastamalaryna toqtalǵan Májilis Tóraǵasy olardyń barlyǵy qarjylyq turǵydan da qoldaý tabatynyn aityp, elimizde áleýmettik jańǵyrtýdyń jańa kezeńi bastalǵanyn atap ótti.
Osy oraida Palata Spikeri depýtattyq korpýstyń róli zor ekenin alǵa tarta kelip: «Eń aldymen Prezidentimizdiń «Nur Otan» partiiasynyń Sezinde bergen barlyq tapsyrmalaryn jedel ári sapaly zańnamalyq qamtamasyz etýimiz qajet. Elbasy Májilis depýtattary, ásirese, memlekettik jáne salalyq baǵdarlamalardy iske asyrýǵa monitoring jasaý jumystaryna belsene qatysýǵa tiis ekendigin atap ótti. Biz osy tapsyrmalardy atalǵan baǵdarlamalardy oryndaýǵa jaýapty quzyrly organ ókilderin «Úkimet saǵatynda», sondai-aq, Májiliske kirgen saiasi partiialar fraktsiialarynyń otyrystarynda tyńdaý arqyly júzege asyrýdy josparlap otyrmyz» , - dedi.
Májilis Tóraǵasy ol otyrystar úkimettik emes uiym músheleriniń, sarapshylardyń, BAQ ókilderiniń qatysýymen ashyq júrgiziletinin aitty.
Sonymen qatar, Biýro otyrysynda Palatanyń aldaǵy jalpy otyrysynyń kún tártibine engiziletin máseleler qatary talqylandy. Kún tártibiniń jobasyna birqatar ratifikatsiialanatyn qujattar jobasy usynyldy. Olar Qazaqstan Resei Federatsiiasy arasyndaǵy Baiqońyr qalasynyń mártebesi týraly kelisim men Qazaqstan men Qytai Úkimetteri arasyndaǵy Qytai Halyq Respýblikasynyń jeńildikti kredit berýi týraly kelisimi. Budan basqa, Májilis Qazaqstan Respýblikasynyń Úkimeti men Tájikstan Respýblikasynyń Úkimeti arasyndaǵy Óteýsiz áskeri-tehnikalyq kómek kórsetý týraly kelisimdi ratifikatsiialaý týraly» zań jobasyn jumysqa alatyn bolady.
.jpeg)