Parlament Májilisiniń tóraǵasy Nurlan Nyǵmatýlinniń tóraǵalyǵymen ótip jatqan jalpy otyrysta depýtattardyń zań shyǵarýshylylyq jumysyna basa nazar aýdaryldy, dep habarlaidy QazAqparat.
Májilistiń jalpy otyrysynda Nurlan Nyǵmatýlin halyqaralyq avtomobil tasymaldaryn qadaǵalap otyrý máselelerine qatysty zań jobasyn talqylaý barysynda Parlament Májilisiniń jumysyn atap ótti.
«Biz depýtattarymyzdyń bastamasymen ázirlengen taǵy bir zań jobasyn maquldadyq. Erekshe aita keterligi bizdiń depýtattardyń zań shyǵarý bastamashylyǵy osy sessiiada óte joǵary. Mysaly, 41 zań jobasyna depýtattar ózderi bastamashy boldy. Aldymyzda taǵy da on shaqty zań jobasy bar», - dedi Májilis Tóraǵasy.
Maquldanǵan qujatta Úkimetke halyqaralyq tasymaldardy qadaǵalap otyrý júiesiniń ulttyq operatoryn aiqyndaý boiynsha quzyrettilik berý usynylady. Sonymen qatar, halyqaralyq avtomobil tasymaldaryn júzege asyrý kezinde elektrondyq sáikestendirgishterdi (navigatsiialyq plombalardy) paidalaný bóliginde tasymaldaýshylarǵa qoiylatyn talaptardy belgileý qarastyrylǵan.
Osylardyń qatarynda elektrondyq sáikestendirgishterdi qasaqana búldirgeni nemese joiǵany úshin ákimshilik jaýaptylyqty engizý jáne elektrondyq sáikestendirgishterdi paidalaný tártibin salyq jáne biýdjetke tólenetin basqa da mindetti tólemderdiń túsýin qamtamasyz etý salasynda basshylyqty júzege asyratyn ýákiletti organnyń bekitýi kózdeledi.
