Májilis tóraǵasy Nurlan Nyǵmatýlin depýtattyq korpýstyń zań jobalarymen jumys isteý barysynda sarapshylar qaýymdastyǵymen ózara is-qimyldy nyǵaitý qajettigi týraly aitty.
Bul týraly Palata spikeri belgili qazaqstandyq saiasattanýshylarmen jáne sarapshylarmen kezdesýine talqylady, dep habarlaidy Májilistiń resmi saity.
Nurlan Nyǵmatýlin Májilistiń azamattyq qoǵam men syndarly usynystar úshin árdaiym ashyq ekenin aityp, sarapshylar qaýymdastyǵy ókilderiniń zań jobalarymen jumys isteýdegi tájiribesine toqtaldy. Bular eń aldymen, áleýmettik, ekonomikalyq salalardy jetildirýge jáne Memleket basshysynyń saiasi reformalaryn iske asyrýǵa arnalǵan zańdar.
Májilis tóraǵasynyń aitýynsha, sarapshylardyń usynystary men pikirleri elimizdi damytýǵa jáne halyqtyń ál-aýqatyn arttyrýǵa baǵyttalǵan sapaly zańdardy daiyndaý úshin mańyzdy.
- Bizdiń ustanymymyz barlyǵyna belgili – ol árdaiym zań shyǵarýshylyq jumys barysynda sarapshylar tarapynan aitylǵan usynystar men pikirlerdi barynsha esepke alý. Biz zań jobalarymen jumys isteý kezinde sizderdiń baǵalaryńyz ben tujyrymdaryńyzǵa súiený úshin sarapshylar qaýymdastyǵymen únemi bailanysta bolýǵa niettimiz, – dedi Nurlan Nyǵmatýlin.
Sondai-aq, Májilis tóraǵasy depýtattardyń zań shyǵarý jumysy kezekti parlamenttik sessiialar arasyndaǵy kezeńde de jalǵasatynyna nazar aýdardy.
Nurlan Nyǵmatýlin atap ótkendei, qazir Májilistiń zańnamalyq qorjynynda 72 zań jobasy bar bolsa, onyń 21-ne depýtattardyń ózderi bastamashy bolǵan.
Májilis spikeri aldaǵy sessiiada depýtattardyń zań shyǵarý qyzmetiniń basym baǵyttary týraly aita kelip, Memleket basshysy Qasym-Jomart Toqaevtyń parlamenttik sessiianyń ashylýynda josparlanyp otyrǵan halyqqa Joldaýynyń oryndalýyn zańnamalyq qoldaýdy qamtamasyz etýdiń mańyzdylyǵyn atap ótti.
Aldaǵy ýaqytta depýtattarǵa aýyldyq, aýdandyq, qalalyq deńgeidegi bilikpen jaýapkershilikti keńeitý máseleleri boiynsha Ekologiialyq kodeks jobasymen de jumys isteý mindeti tur. Óz kezeginde kezdesýge qatysýshylar «Jaiylymdar týraly» Zańdy tiimdi qoldaný, jeke tulǵalardyń bankrottyǵy jáne halyqtyń nesielendirilýi men qoǵamdyq keńesterdiń jumysy siiaqty birqatar máselelerdi kóterdi.
Otyrys barysynda sybailas jemqorlyqqa qarsy zańnamany kúsheitý jónindegi jumysta depýtattyq korpýs pen sarapshylar qoǵamdastyǵynyń yntymaqtastyǵyna erekshe nazar aýdaryldy.
Nurlan Nyǵmatýlin depýtattyq korpýs pen sarapshylar qaýymdastyǵynyń yntymaqtastyǵynyń nátijesinde aýqymdy pikirlerdi eskere otyryp, sapaly zań jobalaryn qabyldaýǵa bolatynyna senim bildirdi.
