Búgin Májilis spikeri Nurlan Nyǵmatýlinniń tóraǵalyǵymen ótken jalpy otyrysta depýtattar Qazaqstan men Qyrǵyz Úkimetteri arasyndaǵy kóshi-qon salasyndaǵy yntymaqtastyq týraly kelisimdi ratifikatsiialaý týraly zań jobasyn maquldady, dep habarlaidy "Ult aqparat".
Nurlan Nyǵmatýlin zań jobasyn talqylaý kezinde osydan bir apta buryn Qyrǵyz Respýblikasynyń Prezidenti elimizge memlekettik saparmen kelip, qos memleket basshylarynyń eki eldiń aýmaǵy arqyly azamattar men kólik quraldarynyń erkin qozǵalysy men tranziti úshin kelisilgen sharalar qabyldaýdyń mańyzyn aitqanyn atap ótti.
- Bul zań jobasy eki el úshin de óte mańyzdy. Sebebi, bizdiń memleketterimizdiń ózara áriptestigi barlyq salada óte tyǵyz. Mysaly, byltyr Qyrǵyzstannan bizdiń elimizge 250 myń azamat kelgen bolsa, al, Qyrǵyz eline Qazaqstannan 175 myń azamat barǵan. Máseleni naqtylap aitqanda, elderimiz arasyndaǵy kóshi-qon máselesin durys retteý úshin osy Kelisimdi ratifikatsiialap otyrmyz, - dedi Májilis Tóraǵasy.
Palata spikeriniń aitýynsha, atalǵan kelisimdi ratifikatsiialaý zańsyz kóshi-qonǵa qarsy kúreste eki el yntymaqtastyǵynyń, kóshi-qon protsesterin retteýdiń, qos azamattyq faktileriniń jolyn kesýdiń tiimdiligin arttyrýǵa múmkindik beredi.
