Búgin Májilis tóraǵasy Nurlan Nyǵmatýlin Chehiia Parlamenti Depýtattar palatasy tóraǵasynyń orynbasary Voiteh Filippen kezdesti. Mártebeli meiman elimizge Qazaqstan Respýblikasy Parlamenti Májilisi jáne máslihattary sailaýyna halyqaralyq baiqaýshy retinde kelgen, dep habarlaidy "Ult aqparat" tómengi palatanyń baspasóz qyzmetine silteme jasap.
Kezdesý barysynda Májilis tóraǵasy elimizde halyqaralyq talaptarǵa sáikes ashyq ta ádil sailaý ótkizý úshin barlyq qajetti jaǵdailar jasalǵanyn atap ótti. Onyń ishinde, epidemiiaǵa qarsy sharalar da qarastyrylǵan.
Sonymen qatar, Nurlan Nyǵmatýlin Májilis depýtattyǵyna kandidattar Qazaqstannyń halyq partiiasy, «Nur Otan», «Aýyl», «Aq jol» jáne «Adal» partiialarynan qatysyp jatqanyn aitty.
Májilis tóraǵasynyń pikirinshe, bul aldaǵy sailaýdyń básekege qabilettiligin kórsetedi. Nurlan Nyǵmatýlin Qazaqstannyń sailaý zańnamasyna sáikes barlyq partiialyq tizimderde genderlik jáne jas mólsherine qatysty kvotanyń eskerilgenine nazar aýdardy. Sondai-aq, eldiń saiasi júiesi jańǵyrtylyp, sonyń nátijesinde saiasi partiialardy tirkeý tártibi jeńildetilip, parlamenttik oppozitsiia institýty engizilip jatqany týraly aityldy.
Óz kezeginde, Chehiia Parlamenti Depýtattar palatasy tóraǵasynyń orynbasary Voiteh Filip Qazaqstandaǵy sailaý naýqanyna daiyndyqqa qatysty pikirimen bólisti.
Osy ýaqytqa deiin Qazaqstanda birneshe sailaýǵa qatysqanyn alǵa tartqan halyqaralyq baiqaýshy bul joly da sailaýdyń demokratiialyq talaptarǵa sai, joǵary deńgeide ótetinine senim bildirdi. Sonymen birge, eki el arasyndaǵy yntymaqtastyq barlyq salada qarqyndy damyp kele jatqanyn aityp, oǵan qazirgi pandemiia kezinde de ekonomikalyq-saiasi bailanystardyń belsendi jalǵasýy naqty dálel ekenin atap ótti.
Kezdesý barysynda taraptar Qazaqstan men Chehiia arasyndaǵy yntymaqtastyq máselelerin talqylap, onyń damýyna eki eldiń parlamentshileri de eleýli úles qosqanyna toqtaldy.
